Stærsti kjötframleiðandi heims greiðir lausnargjald í kjölfar netárásar

Gunnar Reynir Valþórsson skrifar 10. júní 2021 06:53

Pökkunarmiðstöð JBS í Marshalltown í Iowa. epa/Eugene Garcia

Stærsti kjötframleiðandi í heimi, brasilíska stórfyrirtækið JBS, hefur neyðst til að greiða tölvuþrjótum lausnargjald upp á um 11 milljónir dollara.

Ráðist var á tölvukerfi JBS í síðustu viku sem varð til þess að loka þurfti verksmiðjum og sláturhúsum í Ástralíu, Kanada og Bandaríkjunum.

Tölvuþrjótarnir vildu fá greitt í Bitcoin rafmyntinni og á endanum var fallist á kröfur þeirra.

Forseti fyrirtækisins segir ákvörðunina hafa verið þungbæra en þrjótarnir hótuðu að eyðileggja tölvukerfið og eyða gögnum yrði ekki fallist á kröfu þeirra.

Talsmenn fyrirtækisins sögðust einnig hafa neyðst til að greiða lausnargjaldið til að vernda viðskiptavini sína, jafnvel þótt engum gögnum um þá hefði verið stolið.

Samkvæmt heimildarmönnum innan Hvíta hússins er talið líklegt að rekja megi netárásina til Rússlands en Joe Biden Bandaríkjaforseti er í opinberri heimsókn til Evrópu um þessar mundir og hyggst meðal annars ræða tölvuglæpi við Vladimir Pútín Rússlandsforseta.

Brasilía Bandaríkin Rússland Netglæpir Tölvuárásir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.