Körfubolti

Pavel lenti í orðaskaki við fyrrverandi stuðningsmenn

Sindri Sverrisson skrifar
Tveir stuðningsmanna KR gáfu sig á tal við Pavel Ermolinski í DHL-höllinni og gáfu til kynna að hann hefði farið til Vals til að elta peninga.
Tveir stuðningsmanna KR gáfu sig á tal við Pavel Ermolinski í DHL-höllinni og gáfu til kynna að hann hefði farið til Vals til að elta peninga. Stöð 2 Sport

„Persónulegt“ uppgjör KR og Vals, eins og Kristófer Acox orðaði það, hefur ekki farið framhjá neinum. Spennan í einvíginu er áþreifanleg eftir fyrstu tvo leikina og lætin utan vallar of frjálsleg að mati sóttvarnalæknis og yfirlögregluþjóns.

Í liði Vals er hópur manna sem að unnið hefur til fjölda titla með KR. Félagar og vinir mætast því í einvíginu og þjálfarar liðanna hafa þjálfað fyrir bæði félög.

Pavel Ermolinski var fyrstur þeirra leikmanna sem nú eru burðarásar í Val, til að fara úr Vesturbænum yfir á Hlíðarenda. Hann lenti í orðaskaki við gamla stuðningsmenn eftir sigur Vals í DHL-höllinni í fyrrakvöld sem greinilega voru þeirrar skoðunar að Pavel hefði farið í Val til að elta peninga. 

Kristófer, sem líkt og Pavel fór frá KR til Vals, greindi frá því í viðtali við Vísi í fyrrahaust að hann hefði yfirgefið KR vegna vangoldinna launa. Það mál verður tekið fyrir í héraðsdómi í næsta mánuði.

Einvígi KR og Vals er í beinni útsendingu á Stöð 2 Sport og hér að neðan má sjá þegar Pavel ræddi við stuðningsmennina. Næsti leikur einvígisins er á Hlíðarenda á sunnudag.

Klippa: Pavel og stuðningsmenn KR

Körfuknattleikssamband Íslands ítrekaði í gær hvaða reglur gilda um sóttvarnir á kappleikjum, eftir að framganga stuðningsmanna var gagnrýnd á fundi almannavarna vegna fjölda tilkynninga um sóttvarnabrot á leik KR og Vals.

Ljóst er að stuðningsmennirnir tveir sem Pavel ræddi við virtu til að mynda ekki reglur um að gestir séu sitjandi og noti andlitsgrímu, auk þess sem þeir voru innan við tvo metra frá Pavel sem ætla má að skilgreinist sem ótengdur aðili.

Þetta er ekki í fyrsta sinn í einvíginu sem að stuðningsmenn KR láta fyrrverandi hetjur sínar heyra það. Kristófer var kallaður Júdas eins og glögglega mátti heyra í fyrsta leik einvígisins.

Pavel gekk til liðs við Val sumarið 2019. Þessi 34 ára gamli leikmaður hafði þá verið lykilmaður í sjö Íslandsmeistaratitlum með KR og einnig unnið þrjá bikarmeistaratitla.

Ári síðar, eða fyrir yfirstandandi leiktíð, fylgdu Jón Arnór Stefánsson og Kristófer Acox á eftir og í millitíðinni fór Finnur Atli Magnússon sömu leið. Finnur Freyr Stefánsson var ráðinn þjálfari Vals fyrir ári síðan en hann stýrði KR til Íslandsmeistaratitils fimm ár í röð. Darri Freyr Atlason, þjálfari KR, vann aftur á móti þrennu sem þjálfari kvennaliðs Vals 2019.


Domino's-deildirnar í körfubolta eru á Stöð 2 Sport en upplýsingar um útsendingar má finna hér. Domino's-deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.


Tengdar fréttir

Þurfa að passa að láta Miðjuna ekki hræða sig

„Í fyrsta lagi er þetta náttúrulega gaman,“ sagði Kristófer Acox um „persónulegt“ einvígi Vals og KR í 8-liða úrslitum Dominos-deildarinnar í körfubolta. Einvígi sem heldur betur hefur staðið undir væntingum.

Þingmaður setur út á „sora“ KR-inga

Stuðningsmenn KR kölluðu Kristófer Acox, fyrrverandi lykilmann liðsins, Júdas í fyrsta leik einvígis Vals og KR í körfubolta karla. Þingmaðurinn Helga Vala Helgadóttir lýsti hrópum stuðningsmannanna sem „sora“.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.