Erlent

Repúblikanar á móti rannsókn á árásinni á þinghúsið

Kjartan Kjartansson skrifar
Kevin McCarthy, leiðtogi repúblikana í fulltrúadeild Bandaríkjaþings, með Elise Stefanik, nýkjörnum meðstjóranda hans. Stefanik tók sæti Liz Cheney sem var sett út af sakramentinu fyrir að gagnrýna Trump fyrrverandi forseta og lygar hans um kosningarnar í síðustu viku.
Kevin McCarthy, leiðtogi repúblikana í fulltrúadeild Bandaríkjaþings, með Elise Stefanik, nýkjörnum meðstjóranda hans. Stefanik tók sæti Liz Cheney sem var sett út af sakramentinu fyrir að gagnrýna Trump fyrrverandi forseta og lygar hans um kosningarnar í síðustu viku. AP/Alex Brandon

Leiðtogi Repúblikanaflokksins í fulltrúadeild Bandaríkjaþings styður ekki tillögu um að óháð nefnd beggja flokka rannsaki mannskæða árás á þinghúsið 6. janúar. Sumir flokksbræður hans hafa undanfarið tekið til við að gera lítið úr alvarleika árásarinnar.

Fulltrúar repúblikana og demókrata í heimavarnanefnd fulltrúadeildarinnar náðu samkomulagi um tillöguna um stofnun rannsóknarnefndarinnar á dögunum. Hún hefði verið í anda nefndar sem rannsakaði hryðjuverkaárásirnar 11. september árið 2001 og henni hefði verið falið að leggja fram tillögur til að koma í veg fyrir að slík árás gæti endurtekið sig.

Demókratar höfðu krafist þess að slík nefnd yrði stofnuð um marga mánaða skeið til að gera upp atburðina sem leiddu til dauða fimm manns en repúblikanar hafa dregið lappirnar.

Ákvörðun Kevins McCarthy, leiðtoga repúblikana í fulltrúadeildinni, um að styðja tillöguna ekki í dag þýðir að færri þingmenn flokksins greiði atkvæði með henni þar og að örlög hennar í öldungadeildinni séu tvísýn, að sögn AP-fréttastofunnar. Sextíu öldungadeildarþingmenn þurfa að samþykkja tillöguna en flokkarnir hafa fimmtíu þingsæti hvor.

Repúblikanar hafa ekki viljað fallast á rannsóknina á því þegar stuðningsmenn Donalds Trump, þáverandi forseta, slógust við lögreglumenn og brutu sér leið inn í þinghúsið þegar þingmenn ætluðu að staðfesta kjör Joes Biden sem forseta. Þess í stað vildu þeir að slík nefnd rannsakaði einnig ofbeldisverk þeirra sem þeir telja vinstriöfgamenn á mótmælum í fyrra, sérstaklega félaga í hreyfingunni Svört líf skipta máli sem berst gegn kerfislægri kynþáttahyggju og lögregluofbeldi.

McCarthy sagðist ekki geta stutt tillöguna því að hún gengi of skammt í að kanna „tengd afbrigði pólitísks ofbeldis í Bandaríkjunum“. Þá sagði hann að tvíverknaður fælist í því að stofna nefnd til að rannsaka árásina á þinghúsið þar sem þingið og alríkisstjórnin væru fyrir að rannsaka hana.

Vilja ekki styggja Trump

Vefmiðillinn Axios segir að sumir þingmenn repúblikana hafi óttast að nefndin gæti stefnt þeim til að bera vitni í rannsókninni. McCarthy ræddi meðal annars sjálfur við Trump í síma á meðan á árásinni, sem margir hafa lýst sem uppreisn, stóð.

Þá greiddi meirihluti fulltrúadeildarþingmanna repúblikana atkvæði gegn því að staðfesta kosningasigur Biden jafnvel eftir að æstur múgur stuðningsmanna Trump réðst inn í þinghúsið þannig að þingmenn þurftu að fela sig á skrifstofum sínum eða koma sér undan.

Forsenda atkvæðis þeirra gegn staðfestingu úrslitanna voru lygar og rakalausar staðhæfingar Trump um að stórfelld svik hefðu kostað hann sigur í forsetakosningunum í nóvember.

Repúblikanar eru einnig sagði vilji þeir forðast eins og heitan eldinn að styggja stuðningsmenn Trump, sem hefur enn tangarhald á kjarnastuðningsmönnum flokksins, með því að samþykkja rannsókn á atburðunum. Nokkrir þingmenn repúblikana í báðum deildum þingsins greiddu atkvæði með því að kæra Trump fyrir embættisbrot og sakfella hann fyrir þær sakir að hafa æst múginn upp til árásarinnar.

Til marks um þau ítök sem Trump hefur enn í Repúblikanaflokknum úthýstu fulltrúadeildarþingmenn flokksins Liz Cheney, þingkonu frá Wyoming og dóttur fyrrverandi varaforseta flokksins, út forystusveit hans. Glæpur Cheney var að hún hélt áfram að gagnrýna áframhaldandi lygar Trump um að stórfelld kosningasvik hafi kostað hann sigur í forsetakosningunum í nóvember og að greiða atkvæði með því að hann væri kærður fyrir embættisbrot.

„Munið þennan dag að eilífu“ - Vísir (visir.is)

Líkti uppreisnarmönnunum við ferðamenn

Þrátt fyrir að hann sé nú sviptur aðgangi að samfélagsmiðlum hefur Trump haldið áfram að ljúga blákalt um kosningarnar í nóvember í stuttum yfirlýsingum sem hann lætur aðstoðarmenn sína senda út nær daglega.

Eftir að sumum repúblikönum virtist í fyrstu nóg boðið yfir framferði Trump í janúar og hlut hans í árásinni á þinghúsið eru margir þeirra nú byrjaðir að endurskrifa söguna og gera lítið úr hversu alvarleg hún var, þvert á staðreyndir málsins.

Á nefndarfundi þar sem árásin var rædd í síðustu viku líktu sumir repúblikanar uppreisnarfólkinu sem braust inn í þinghúsið við „ferðamenn“, gagnrýndu yfirvöld fyrir að handtaka og sækja það til saka og lýstu yfir efasemdum um að uppreisnarfólkið hefði í raun og veru verið stuðningsmenn Trump, að sögn Washington Post.

Múgurinn sem réðst á þinghúsið kom beint af útifundi sem Trump hélt í Washington-borg eftir að hann hvatti hann til þess að leggja leið sína í þinghúsið til þess að mótmæla því að kjör Biden yrði staðfest.

Um 140 lögreglumenn særðust þegar um tíu þúsund stuðningsmenn Trump umkringdu þinghúsið. Sumir uppreisnarmannanna notuðu fánastangir og hafnaboltakylfur til að berja lögreglumenn og missti einn þeirra auga eftir átökin. Uppreisnarmennirnir kyrjuðu slagorð um að „hengja Mike Pence“ varaforseta sem Trump hafði logið að stuðningsmönnum sínum að hefði völd til að stöðva kjör Biden. Einhverjir þeirra reistu gálga fyrir utan þinghúsið.

Þegar um 800 manns komust inn í þinghúsið reyndu þeir að brjótast inn í sal fulltrúadeildarinnar og fóru um skrifstofur þingmanna, þar á meðal Nancy Pelosi, forseta fulltrúadeildarinnar. Brutu uppreisnarmennirnir rúður og var einn þeirra skotinn til bana þegar hann reyndi að fara inn um brotinn glugga. Einn þingmaður repúblikana sakaði lögreglu um að hafa tekið uppreisnarmanninn af lífi í síðustu viku.


Tengdar fréttir

Stefanik tekin við af Cheney

Þingmenn Repúblikanaflokksins í fulltrúadeild Bandaríkjaþings hafa kosið að gera þingkonuna Elisu Stefanik, frá New York, að þriðja æðsta meðlimi þingflokksins. Hún bar sigur úr býtum gegn þingmanninum Chip Roy, frá Texas. Atkvæðagreiðslan fór 134-46.

Innanbúðarfólkið sem varð utangarðs

Repúblikanarnir og þingmennirnir Liz Cheney og Mitt Romney hafa um árabil verið í innsta hring Repúblikanaflokksins í Bandaríkjunum. Cheney er til að mynda þriðji æðsti þingmaður flokksins, formlega séð og Romney var eitt sinn forsetaefni hans gegn Barack Obama.

Öldunga­deildin kallar til vitni í réttarhöldunum

Öldungadeild Bandaríkjaþings samþykkti fyrir skömmu að kalla til vitni í réttarhöldum deildarinnar yfir Donald Trump, fyrrverandi Bandaríkjaforseta. Trump er ákærður fyrir embættisbrot.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.