Körfubolti

Giannis og félagar unnu annan sigurinn á Brooklyn Nets á nokkrum dögum

Óskar Ófeigur Jónsson skrifar
Grikkinn Giannis Antetokounmpo var einbeittur í sigurleiknum á Brooklyn Nets í nótt.
Grikkinn Giannis Antetokounmpo var einbeittur í sigurleiknum á Brooklyn Nets í nótt. AP/Aaron Gash

Milwaukee Bucks hefur sýnt styrk sinn á móti hinum toppliðunum í Austurdeildinni að undanförnu í NBA-deildinni í körfubolta og enn eitt dæmið um það var í nótt.

Giannis Antetokounmpo skoraði 36 stig og tók 12 fráköst þegar Milwaukee Bucks vann 124-118 sigur á Brooklyn Nets aðeins þremur dögum eftir að hafa unnið annað leik sömu liða. Bucks liðið var sex stigum undir þegar tíu mínútur voru eftir en náðu þá 18-1 spretti.

Nets liðið hefur ekkert ráðið við Giannis í þessum tveimur leikjum en hann skoraði samtals 85 stig í þeim. Þetta var þriðji sigur Milwaukee í röð.

Milwaukee Bucks er ennþá í þriðja sætinu í Austurdeildinni, þremur sigrum á eftir Philadelphia 76 ers og einum og hálfum á eftir Brooklyn. Liðið vann hins vegar þessa báða leiki á móti Nets sem og tvo leiki á stuttum tíma á móti Philadelphia fyrir tveimur vikum.

James Harden var samt ekki með Brooklyn í þessum leikjum og 76ers var ekki með Joel Embiid og Ben Simmons báða saman í hinum tveimur leikjunum.

Jrue Holiday var mjög góður hjá Bucks með 23 stig, 10 stoðsendingar og 8 fráköst. Khris Middleton skoraði einnig 23 stig og Donte DiVincenzo var með 15 fráköst og 10 stig.

Kyrie Irving skoraði 38 stig fyrir Brooklyn Nets og Kevin Durant var með 32 stig, 9 fráköst og 6 stoðsendingar en liðið tapaði þarna þriðja leiknum sínum í röð.

Devin Booker skoraði 31 stig og Chris Paul bætti við 23 stigum og 16 stoðsendingum þegar Phoenix Suns vann 134-118 sigur á Cleveland Cavaliers í framlengdum leik. Suns liðið skoraði fimmtán fyrstu stigin í framlengingunni sem þeir unnu 20-4.

Þetta var fimmti sigur Phoenix liðsins í röð og liðið er við hlið Utah Jazz á toppi Vesturdeildarinnar. Bæði liðin hafa unnið 47 leiki og tapað 18.

Tim Hardaway Jr. var með 36 stig þegar Dallas Mavericks komst upp í fimmta sætið í Vesturdeildinni með 127-113 sigri á Miami Heat. Luka Doncic var með 23 stig, 12 fráköst og 8 stoðsendingar. Tim Hardaway yngri hitti úr 10 af 18 þriggja stiga skotum sínum en hann var að spila í höllinni þar sem treyja föður hans hangir í loftinu.

Dallas liðið er þar með komið upp fyrir Los Angeles Lakers á innbyrðis viðureignum en þetta var fjórði sigur Mavericks manna í síðustu fimm leikjum og sá sjöundi í síðustu níu.

Paul George og Marcus Morris skoruðu báðir 22 stig þegar Los Angeles Clippers endaði þriggja leikja taphrinu með 105-100 sigur á Toronto Raptors. Clippers átti á hættu að tapa fjórum í röð í fyrsta sinn á leiktíðinni.

Lonzo Ball bauð upp á smá skotsýningu á móti Steph Curry og félögun því hann var með sjö þrista og 33 stig þegar New Orleans Pelicans vann 108-103 sigur á Golden State Warriors.

Kvöldið áður hafði Golden State unnið leik liðanna en þá klikkaði Ball á 15 af 18 skotum sínum.

Stephen Curry skoraði sjálfur 37 stig í leiknum og hitti úr átta þriggja stiga skotum en honum mistókst að koma Warriors yfir þegar tuttugu sekúndur voru eftir.

Zion Williamson hjá Pelíkönunum var með 23 stig, 12 fráköst, 7 stoðsendingar og 4 stolna bolta í leiknum.

Úrslitin í NBA-deildinni í nótt:

  • Milwaukee Bucks - Brooklyn Nets 124-118
  • Los Angeles Clippers - Toronto Raptors 105-100
  • Cleveland Cavaliers - Phoenix Suns 118-134 (framl.)
  • Miami Heat - Dallas Mavericks 113-127
  • New Orleans Pelicans - Golden State Warriors 108-103
  • Detroit Pistons - Charlotte Hornets 99-102
  • Oklahoma City Thunder - Sacramento Kings 99-103
NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.