Atvinnulíf

„Ég hef ekki tíma“

Rakel Sveinsdóttir skrifar
Mörgum líður eins og það sé aldrei tími til að sinna þeim verkefnum sem okkur langar mest til að sinna. En þá er um að gera að nýta sér einföld en góð ráð, til að læra að búa til þennan tíma.
Mörgum líður eins og það sé aldrei tími til að sinna þeim verkefnum sem okkur langar mest til að sinna. En þá er um að gera að nýta sér einföld en góð ráð, til að læra að búa til þennan tíma. Vísir/Getty

„Ég hef ekki tíma.“ Við höfum öll hugsað þetta. Mörg okkar sagt þetta upphátt. Kapphlaupið, stressið og það hversu fljótt tíminn líður gerir það hreinlega að verkum að okkur tekst engan veginn að gera allt sem okkur langar til að gera. Eða þyrftum að gera. Hvað þá verkefni sem kalla á næði, sköpun, hugmyndarflug…. Hver hefur tíma í þann lúxus?

Staðreyndin er þó sú að það er alltaf til tími. Fyrir allt.

Það sem við þurfum að gera er að læra hvernig við búum hann til!

Enda höfum við öll tekið eftir því að sumt fólk virðist geta gert ótrúlega margt; Vinnur fulla vinnu, sinnir maka, börnum og heimili, ræktar vinskap við vinina og sín eigin áhugamál. Hvernig fer þetta fólk að þessu öllu?

Jú, það hefur lært hvernig það býr til tímann.

Hér eru þrjú einföld atriði sem geta skipt sköpum.

1. Tímastilltu verkefnin

Leið til að búa til nýjan tíma, er að takmarka þann tíma sem önnur verkefni fá. Í staðinn fyrir að búa einungis til verkefnalista yfir það sem þú ætlar þér að gera í dag, tekur þú ákvörðun um það klukkan hvað og hversu langan tíma hvert verkefni fær.

Sérstaklega er mælt með því að fólk fækki þeim mínútum sem að öllu jöfnu fara í samfélagsmiðlana, að vafra á netinu eða fækki sjónvarpsmínútum um nokkrar mínútur á kvöldin og um helgar. Velji þess í stað að gera eitthvað skapandi.

2. Nýttu gleðina og tilhlökkunina

Einn besti drifkrafturinn sem við búum yfir er gleði. Þennan eiginleika eigum við að nota oftar til að búa okkur til tíma til að gera fleiri hluti sem okkur langar til að gera. Til dæmis eitthvað skapandi eða í næði.

Í stað þess að hugsa ,,ég hef ekki tíma,“ eigum við að hugsa ,,ég hlakka svo til þegar að ég kemst í þetta.“ Þannig nýtum við gleðina og tilhlökkunina til að halda okkur við efnið og þá dagskrá sem við höfum búið okkur til með því að takmarka tíma sem ýmiss önnur verkefni fá.

3. Veldu einfaldleikann

Að skapa, að gefa sér tíma til að hugsa, hugleiða eða fá nýjar hugmyndir, hafa svigrúmið til að setjast niður og skrifa niður markmiðin okkar eða drauma….. allt eru þetta verkefni sem okkur langar mörgum til að gera en gefum okkur ekki tíma til. Vegna þess að við trúum því að tíminn sé ekki til!

En til viðbótar við fyrstu tvö atriðin, er gott að byrja á því að taka ákvörðun um eitthvað sem þú ætlar þér að gera en hafa það mjög einfalt. Því um leið og við ætlum okkur of stór skref eða of margt í einu, aukast líkurnar á því að við gefumst upp og allt verður eins og áður.

Ímyndum okkur til dæmis að þú viljir setjast niður og gefa þér góðan tíma í að skrifa niður helstu markmiðin þín. Í staðinn fyrir að byrja á því að búa til tólf mánaða plan, gætir þú byrjað á því að gefa þér tíma til að sinna markmiðalistanum fyrir eina viku í senn. 

Og áður en þú veist af, hefur þú búið þér til tíma til að sinna þessu verkefni í næði, ert farinn að fylgja því eftir í hverri viku og jafnvel farinn að búa þér tíma til að gera ýmislegt annað sem þú telur í dag að „þú hafir ekki tíma til að gera.“


Tengdar fréttir

Leið til að hætta ekki við góðar hugmyndir

Langar þig að stofna þinn eiginn rekstur? Eða ertu með einhverja góða hugmynd fyrir vinnuna, sem þú þorir ekki að velta í framkvæmd? Hér rýnum við í það hvað getur verið að aftra fólki frá því að fylgja hugmyndum eftir.

Góð ráð til að sporna við „ofhugsunum“

Að ofhugsa eða verja óendanlegum tíma í að greina hluti og kryfja þá er vandamál sem margir kannast við. Heilu dagarnir geta farið í þessar hugsanir, sem þó leiða oft ekki til neinna lausna.

Fimm einkenni rafrænnar þreytu sem allir þurfa að taka alvarlega

„Þó að rafræn samvera geti sannarlega gert okkur nánari, getur hún einnig orðið til þess að við finnum fyrir meiri einangrun. Þegar við verjum mörgum klukkustundum á viku á Teams-fjarfundum eða Zoom-fyrirlestrum getur það leitt til rafrænnar þreytu,“ segir Ingrid Kuhlman framkvæmdastjóri Þekkingarmiðlunar.

Frestunaráráttan: Að komast út úr vítahringnum

Stundum er frestunarárátta meðfædd en oft er hægt að vinna sig út úr þeim vítahring að fresta sumum hlutum ítrekað segir Arnar Sveinn Geirsson verkefnastjóri hjá Auðnast. Við fáum samviskubit og líður illa ef við festumst í vítahring frestunaráráttu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.