Tónlist

Rúrik fagnar útgáfu myndbands og blæs á slúðursögurnar

Sylvía Rut Sigfúsdóttir skrifar
Rúrik Gíslason er byrjaður að gefa út tónlist undir nafninu Rurik.
Rúrik Gíslason er byrjaður að gefa út tónlist undir nafninu Rurik. Stefán John Turner

Rúrik Gíslason sendi í dag frá sér nýja útgáfu af laginu sínu Older. Lagið og meðfylgjandi myndband var tekið upp í Hörpu tónlistarhúsi.

Older (Live at Harpa) er framhald og rólegri útgáfa af laginu Older sem kom út fyrir stuttu og er fyrsta lagið sem listamaðurinn Rurik gefur út. Myndbandið má sjá hér neðar í fréttinni.

Hér í þessari útgáfu sameinar hann sína krafta með lækninum og einum bjartasta pródúser landsins, Victori Guðmundsyni eða Doctor Victor. Hann samdi meðal annars eitt vinsælasta lag sumarsins 2019, Sumargleðin.

Doctor Victor og Rurik

„Older snýst því um mikilvægi þess að hafa gaman og ná því besta úr lífinu. Skilaboðin eru að forðast væntingarnar, gera sittb sta og reyna að hafa gaman af þessu,“ segir Rurik um lagið.

„Myndbandið sem fylgir er tekið upp í Eldborg í Hörpunni og samanstendur af frábæru teymi úr bæði tónlist og tökuheiminum til að fanga magnað augnablik og sameiningarboðskap Older,“ segir um myndbandið sem sjá má í spilaranum hér fyrir neðan. Þar koma fram fjöldi tónlistarmanna og söngvara með fyrrum knattspyrnumanninum.

Ástríðan bara leiksýning

Rúrik ræddi við Brennsluna á FM957 fyrr í dag og ræddi þar meðal annars um myndbandið og danskeppnina Lets Dance sem hann tekur þátt í. Sögusagnir hafa verið á sveimi um Rúrik og dansfélaga hans Renötu.

„Það er á forsíðunum á öllum blöðunum hérna að ég sé að daðra við Renötu og hún sé að daðra við mig,“ segir Rúrik. Síðast i gær hafi verið fjallað um það í stóru blaði að hann gæti ekki haldið höndunum af Renötu. Rúrik segir að samband þeirra sé samt mjög faglegt.

„Maðurinn hennar er líka í þáttunum og er topp maður.“

Rúrik segir því að ástríðan á milli þeirra í dansinum sé bara leikþáttur.

„Ég skil alveg að þetta lítur þannig út í þáttunum og auðvitað verðum við líka að láta þetta líta þannig út í þáttunum. Í svona dansi, þetta er bara leiksýning.“

Símaviðtalið við Rúrik má heyra í spilaranum hér fyrir neðan. Hann keppir næst í dansinum í kvöld og mun þar vera á skemmtilegum nótum í Quick Step. 


Tengdar fréttir

„Man ekki til þess að ég hafi séð betri karldansara í svona þáttum“

„Það er mjög athyglisvert að fylgjast með frammistöðu Rúriks okkar Gíslasonar í þættinum Let´s Dance í Þýskalandi, sem er systurþáttur okkar Allir geta dansað. Mikið óskaplega hlýtur almættið að hafa verið í góðu skapi þegar það bjó til hann Rúrik. Það er ekki nóg að hann lítur út eins og grískur guð úr fornbókmenntunum, heldur er hann líka algert hæfileikabúnt. Ég er búinn að sjá þrjá dansa sem hann hefur dansað í keppninni og eru þeir hver öðrum betur dansaðir,“ segir Jóhann Gunnar Arnarsson, danssérfræðingur, sem hefur verið dómari í þáttunum Allir geta dansað á Stöð 2 undanfarin ár.






Fleiri fréttir

Sjá meira


×