Búin að gráta mikið en get leitað í marga reynslubanka

Steinunn er nú í sóttkví í sumarbústað með Rut Jónsdóttur, stöllu sinni úr landsliðinu, eftir ferðina örlagaríku til Skopje. Fyrir íslenska landsliðið var það ferð til fjár því liðið komst í umspil um sæti á HM á Spáni. Fyrir Steinunni virðist fyrsti landsleikur hennar sem fyrirliði hins vegar hafa verið hennar síðasti leikur á þessu ári.

„Ég get ekki stigið í fótinn nema að haltra og er alveg kvalin ennþá. Ég finn að það er eitthvað að angra mig. Það bendir allt til þess að krossbandið sé farið. Ég á eftir að fá það staðfest en ég undirbý mig fyrir það,“ segir Steinunn.

Steinunn byrjaði leikinn gegn Norður-Makedóníu frábærlega og kom Íslandi í 7-2 með marki úr hraðaupphlaupi. Hún meiddist í sama mund, eins og sjá má hér að neðan.

Steinunn fer í myndatöku á þriðjudaginn, þegar hún er laus úr sóttkví. Hún segir öll próf sem sjúkraþjálfarar landsliðsins settu hana í hins vegar benda til þess að krossband hafi slitnað. 

Fyrir tveimur mánuðum blindaðist Steinunn eftir högg á auga, í leik með Fram gegn FH, en hún jafnaði sig fljótt af því. Það tekur hins vegar 9-12 mánuði að jafna sig af krossbandsslitum.

Aðstæður í Skopje hjálpuðu ekki til

„Ég hef aldrei slitið krossband áður. Ég hef lent í alls konar meiðslum en hélt einhvern veginn að hnén mín væru ódauðleg. Þetta er greinilega bara óheppni. 

Ég ætla ekki að kenna því um en það hjálpaði ekki til að við skyldum vera að spila á dúk. Hann er mjög stamur og það er ástæða fyrir því að hvergi eru byggð íþróttahús með dúkum í dag,“ segir Steinunn, en ítrekar að hún kenni þó ekki aðstæðum í Skopje um hvernig fór.

Steinunn ber sig ansi vel og það er létt í henni hljóðið, en hún viðurkennir að áfallið raungerist kannski frekar á næstu dögum.

Þakklát fyrir stuðninginn

„Það má segja að ég sé heppin með það að ég þekki margar sem hafa lent í krossbandsslitum. Ég get leitað í ansi marga reynslubanka. Ég viðurkenni að ég er búin að gráta mikið og vera sorgmædd yfir þessu en það er ótrúlegt hvað maður getur samt bara horft fram á veginn. Ég á samt örugglega eftir að fá eitthvað áfall þegar ég kem heim til fjölskyldunnar og kem aftur í Framheimilið,“ segir Steinunn, og bætir við:

„Við Rut erum hér saman í bústað og hún heldur vel utan um mig og lætur mér líða vel. Ég er mjög heppin hvað það varðar, og eins með alla sem voru í kringum mig úti í Norður-Makedóníu, liðsfélaga og starfsfólkið. Þau héldu svo fáránlega vel utan um mig. Án þeirra hefði þetta verið mikið, mikið erfiðara.“

Erfitt að ætla að huga að úrslitakeppninni á næsta ári

Ísland mætir Slóveníu í tveimur leikjum í apríl sem ráða því hvort liðanna kemst á HM á Spáni í desember. Fram er svo í baráttu við Rut og hennar lið í KA/Þór um deildarmeistaratitilinn í Olís-deildinni, og Framkonur ætla sér alla þrjá titlana sem í boði eru í vor og sumar. Steinunn kemur til með að missa af því öllu saman.

„Það er svo erfitt að hugsa til þess hvað þetta er langur tími sem fer í þessi meiðsli. „Já, ég verð bara klár í úrslitakeppnina á næsta ári.“ Þetta er alveg galið. Tímasetningin er alveg sérstaklega glötuð núna, í fyrsta leik sem fyrirliði og framundan spennandi tímar með Fram og landsliðinu. Maður er líka orðinn þrítugur og langar að stækka fjölskylduna. Þetta er alveg frekar leiðinlegt,“ segir Steinunn.

Bullandi séns gegn Slóvenum

Steinunn var með nýfædda dóttur sína hjá sér í stúkunni þegar hún fylgdist með Íslandi gera 30-30 jafntefli við Slóveníu í Laugardalshöll í mars 2018, í undankeppni EM. Ísland tapaði útileiknum 28-18, en Steinunn segir svo sannarlega möguleika fyrir hendi á að komast á HM með því að slá út Slóveníu í næsta mánuði:

„Þetta er ótrúlega spennandi mótherji. Það er alveg bullandi séns fyrir okkur, alla vega miðað við það ef við hefðum dregist gegn Rússum eða eitthvað slíkt. Slóvenar hafa þó verið á öllum stórmótum síðustu ár og eru með frábært lið. Þær munu hins vegar aldrei vanmeta okkur, því þær eru ekki í allra fremstu röð,“ segir Steinunn.