Handbolti

Næsta markið hennar verður númer hundrað í vetur

Óskar Ófeigur Jónsson skrifar
Ragnheiður Júlíusdóttir hefur raðað inn mörkum fyrir Framliðið í vetur.
Ragnheiður Júlíusdóttir hefur raðað inn mörkum fyrir Framliðið í vetur. Vísir/Daníel Þór

Ragnheiður Júlíusdóttir er langmarkahæsti leikmaður Olís deildar kvenna í handbolta í vetur en hún hefur skorað 24 mörkum meira en sú næsta á lista.

Ragnheiður Júlíusdóttir hefur nú skorað 99 mörk í 11 leikjum með Framliðinu á tímabilinu sem gera 9,0 mörk í leik. Það er 24 mörkum meira en Lovísa Thompson sem er næstamarkahæst í deildinni en Lovísa hefur reyndar leikið einum leik meira en Ragnheiður.

Næsta mark Ragnheiðar verður því hennar hundraðasta mark í deildinni í vetur en Framliðið mætir Stjörnunni í kvöld.

Ragnheiður skoraði 113 mörk í átján leikjum í fyrra og er því að bæta markaskor sitt talsvert frá því á síðustu leiktíð þegar hún var með 6,3 mörk í leik.

Valskonan Lovísa Thompson hefur leikið einum leik meira en Ragnheiður sem þýðir að Ragnheiður er að skora 2,3 mörkum meira að meðaltali í leik en Stjörnukonan Eva Björk Davíðsdóttir sem hefur skorað 6,7 mörk í leik.

Þrátt fyrir þessa yfirburði á markalistanum þá hafa tveir leikmenn deildarinnar skorað fleiri mörk utan af velli heldur en Ragnheiður. Lovísa Thompson hefur skorað 71 mark þegar vítaskotin eru tekin frá og Stjörnukonan Helena Rut Örvarsdóttir 69 mörk en Ragnheiður er með 67 mörk utan af velli.

HSÍ og HB Statz eru reyndar ekki sammála með markaskor Stjörnukvenna í vetur. HSÍ er með Eva Björk Davíðsdóttur í 74 mörkum en Helenu Rut Örvarsdóttur í 69 mörkum en hjá HB Statz þá munar bara einu marki á þeim, Eva Björk er þar með 72 mörk en Helenu Rut 71 mark.

Flest mörk í Olís deild kvenna í vetur:

  • Ragnheiður Júlíusdóttir, Fram 99/32
  • Lovísa Thompson, Val 75/4
  • Eva Björk Davíðsdóttir, Stjörnunni 74/34
  • Helena Rut Örvarsdóttir, Stjörnunni 69
  • Rut Jónsdóttir, KA/Þór 70/34
  • Sara Odden, Haukum 61
  • Þórey Anna Ásgeirsdóttir, Val 56/20
  • Sunna Jónsdóttir, ÍBV 54
  • Sigríður Hauksdóttir, HK 52/6
  • Ásdís Guðmundsdóttir, KA/Þór 51/16
  • Birna Berg Haraldsdóttir, ÍBV 51

Flest mörk utan af velli í Olís deild kvenna í vetur:

  • Lovísa Thompson, Val 71
  • Helena Rut Örvarsdóttir, Stjörnunni 69
  • Ragnheiður Júlíusdóttir, Fram 67
  • Sara Odden, Haukum 61
  • Sunna Jónsdóttir, ÍBV 54
  • Birna Berg Haraldsdóttir, ÍBV 51
  • Karólína Bæhrenz, Fram 48
  • Sigríður Hauksdóttir, HK 46
  • Britney Cots, FH 43
  • Hrafnhildur Hanna Þrastardóttir, ÍBV 42

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.