Innlent

Helgarveðrið með hagstæðasta móti

Sunna Kristín Hilmarsdóttir skrifar
Það er spáð ágætis veðri um helgina.
Það er spáð ágætis veðri um helgina. Vísir/Vilhelm

Í dag er útlit fyrir sunnan fimm til tíu metra á sekúndu með skýjuðu veðri og lítilsháttar rigningu af og til en á Norður- og Austurlandi verður þurrt og bjart. Hiti verður á bilinu tvö til sjö stig.

Þetta kemur fram í hugleiðingum veðurfræðings á vef Veðurstofu Íslands. Þar segir jafnframt að í kvöld og nótt bæti í úrkomu á landinu en á morgun dragi svo úr henni aftur.

Það verði því meira og minna þurrt á stórum hluta landsins á morgun og vindur með hægasta móti.

„Á sunnudag er síðan áfram hægviðri í kortunum og yfirleitt þurrt og einnig gæti sólin náð að skína nokkuð víða. Hiti breytist lítið og verður á bilinu 2 til 7 stig yfir daginn.

Það má því segja að helgarveðrið sé með hagstæðasta móti miðað við árstíma og um að gera að njóta meðan er,“ segir í hugleiðingum veðurfræðings.

Veðurhorfur á landinu:

Suðlæg átt 5-10 m/s. Lítilsháttar rigning í dag, en bjartviðri á Norður- og Austurlandi. Bætir í rigningu á Suður- og Vesturlandi í kvöld. Hiti 2 til 7 stig.

Suðlæg eða breytileg átt 3-8 á morgun. Dálítil væta á köflum og hiti 2 til 6 stig, en svolítil él um landið norðaustanvert og hiti um frostmark.

Á laugardag:

Breytileg átt 3-8 m/s og víða dálítil væta, en þurrt að kalla síðdegis. Hiti 1 til 6 stig. Austan 5-10 og él um landið norðaustanvert með hita um frostmark.

Á sunnudag:

Hæg breytileg átt, þurrt veður og bjart með köflum. Hiti 1 til 6 stig. Suðaustan 5-10 og smáskúrir sunnanlands seinnipartinn.

Á mánudag:

Suðlæg átt 5-13 m/s og rigning eða slydda með köflum, en úrkomulítið norðaustanlands fram á kvöld. Hiti 0 til 5 stig.

Á þriðjudag:

Austlæg átt og dálitlir skúrir eða él í flestum landshlutum. Hvessir á landinu um kvöldið með rigningu suðaustantil. Hiti um og yfir frostmarki.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×