„Fokk! Er þetta að gerast aftur?“

Hallgrímur hefur nefnilega horft á tvo leiki Southampton í treyjunni og báðir hafa þeir tapast 9-0. Þó honum sé alls ekki skemmt þá hafði Hallgrímur þó húmor fyrir þessari, að hans mati, „óáhugaverðu“ staðreynd og benti á hana í hópnum „Algjörlega óáhugaverðar fótboltaupplýsingar“ á Facebook í gærkvöld.

Hallgrímur keypti sér treyjuna þegar hann fór ásamt syni sínum til Englands haustið 2019 að sjá sína menn spila, en það var fyrsta ferð Hallgríms á leik með liðinu í fimmtán ár. Leikurinn var gegn Leicester og tapaðist 9-0.

Mágurinn benti á staðreyndina

Treyjuna hafði Hallgrímur síðan geymt inn í skáp í rúmt ár, þar til í gær. Southampton mætti þá Manchester United og Hallgrímur horfði á leikinn með mági sínum, Einari, sem er stuðningsmaður United. Aftur tapaði Southampton 9-0, eftir að hafa meðal annars misst Alexandre Jankewitz af velli með rautt spjald strax á 2. mínútu og svo Jan Bednarek á 86. mínútu. Slík úrslit eru ekki beinlínis algeng.

„Á einhverjum tímapunkti lítur Einar á mig og spyr; „Ertu ekki í sömu treyju og þú varst í á hinum 9-0 leiknum?“ Ég var ekkert að hugsa út í treyjuna. Fyrir mér var þetta bara; „Ó, fokk! Er þetta að gerast aftur?“,“ sagði Hallgrímur við Vísi í dag.

Fékk Southampton-uppeldið frá ólympíufara

Ralph Hasenhüttl hefur sett saman skemmtilegt lið hjá Southampton en eftir fjögur töp í deildinni í röð er liðið þó komið niður í 12. sæti ensku úrvalsdeildarinnar. Southampton sló Arsenal út úr bikarnum fyrir tíu dögum.

„Við erum búnir að eiga skemmtilegt tímabil, og vorum tímabundið í fyrsta sæti í fyrsta sinn síðan sautjánhundruðogsúrkál. Loksins er maður spenntur fyrir leikjum á móti topp sex liðunum. Man U var nýbúið að tapa fyrir Sheffield United og maður sá alveg séns þarna í gær, en svo fór maður að fá „flashback“ þegar rauða spjaldið og fyrstu mörkin komu. Í hálfleik sagði ég einmitt að allt undir níu mörkum væri jákvætt,“ sagði Hallgrímur.

Hallgrímur er af miklum Skagaættum og náfrændi hans, badmintonkempan og ólympíufarinn Árni Þór Hallgrímsson, á langstærstan þátt í því að Hallgrímur skuli styðja Dýrlingana. Sá stuðningur mun ekkert minnka þrátt fyrir hin tvö stóru töp.

„Árni er móðurbróðir minn og átti sinn þátt í að ala mig upp. Hann er frægasti Southampton stuðningsmaður landsins og kenndi mér að syngja lögin þegar ég var tveggja ára. Ég hef haldið með liðinu síðan. Maður skiptir ekki um fótboltalið.“