Viðskipti innlent

Enn fækkar stöðum hjá Gló og Joe & the Juice

Eiður Þór Árnason skrifar
Búið er að loka Gló og Joe & the Juice á Laugavegi fyrir fullt og allt.
Búið er að loka Gló og Joe & the Juice á Laugavegi fyrir fullt og allt. Vísir/Joe & the Juice

Þremur veitingastöðum Gló hefur verið lokað á síðustu tíu mánuðum og eftir stendur einungis einn staður í Fákafeni. Fjármálastjóri segir að heimsfaraldurinn hafi reynst veitingabransanum erfiður og að stjórnendur reyni nú að koma jafnvægi á reksturinn. Þá hefur Joe & the Juice, sem er að hluta til í eigu sömu aðila, lokað flestum stöðum sínum tímabundið og tveimur varanlega.

Gló í Hæðarsmára í Kópavogi mun ekki opna aftur eftir að tímabundin lokun vegna samkomutakmarkana reyndist varanleg. Þar áður hafði veitingastöðunum á Laugavegi og Engjavegi verið lokað í mars þegar 20 manna samkomubann tók gildi. Um tíma var enginn veitingastaður starfræktur undir merkjum Gló hér á landi en útibúið í Fákafeni opnaði aftur um áramót.

Agla Jónsdóttir, fjármálastjóri Gló, segir að Covid-19 faraldurinn og sóttvarnatakmarkanir hafi eðlilega haft mikil áhrif á reksturinn. Það hafi ekki síður átt við á Laugavegi þar sem viðskiptavinir voru að stærstum hluta erlendir ferðamenn. 

Um varnaraðgerð að ræða

„Það var erfitt að láta hlutina ganga upp, þannig að við litum svo á að það væri best að einbeita okkur bara að Fákafeni, gera það vel og sjá hvað árið 2021 gefur okkur. Þetta er varnaraðgerð líka því maður veit auðvitað ekki hversu lengi þessara áhrifa mun gæta,“ segir Agla. Þrátt fyrir allt sem á undan hafi gengið sé hún bjartsýn á komandi ár. 

Ólíkt fjölmörgum veitingastöðum hefur Gló ekki boðið upp á heimsendingar í samkomubanni og hefur það líklega gert keðjunni erfiðara fyrir að standa af sér storminn.

„Við höfum ekki bolmagnið í það. Við erum ekki með bílaflotann og kusum að fara ekki þá leið að fara í samningaviðræður við aðra varðandi heimsendingar.“

Þess í stað hafi áhersla verið lögð á að bjóða upp á netpantanir og snertilausa afhendingu.

Hrun ferðaþjónustunnar mikið áfall fyrir rekstur Joe & the Juice

Tekin hefur verið ákvörðun um að loka Joe & the Juice á Laugavegi fyrir fullt og allt en Agla er sömuleiðis framkvæmdastjóri Joe & the Juice á Íslandi. Fréttablaðið greindi fyrst frá lokun staðarins.

Hún segir að líkt og með nálægan veitingastað Gló hafi erlendir ferðamenn verið helsti viðskiptahópur staðarins. Hvarf ferðamanna hafði þó ekki síður áhrif á önnur útibú.

„Það sem gerðist á síðasta ári var að við lokuðum öllum þremur stöðum á Keflavíkurflugvelli 1. apríl og erum endanlega búin að loka einum stað þar.“

Þá var báðum stöðum Joe & the Juice í miðbæ Reykjavíkur lokað tímabundið þegar samkomubann var hert í október en til stendur að opna staðinn á Hafnartorgi aftur í næstu viku. 

Agla bætir við að þau bíði nú átekta og skoði hvenær hægt verði að opna hina tvo staðina í Leifsstöð en þeir hafa verið fyrirtækinu einna arðbærastir.

Á sama tíma hefur Joe & the Juice opnað nýjan stað við Miklubraut og fært staðinn sem var í World Class Laugum í Fákafen þar sem hann deilir nú húsnæði með Gló auk Brauð & co. Hjónin Birgir Bieltvedt og Eygló Björk Kjartansdóttur eru stærstu eigendur Gló og Joe & the Juice auk þess að vera fjárfestar í Brauð & co.


Tengdar fréttir

Solla selur Birgi Gló

Hjónin Sólveig Eiríksdóttir og Elías Guðmundsson hafa selt hjónunum Birgi Bieltvedt og Eygló Björk Kjartansdóttur 30 prósenta hlut sinn í veitingastaðakeðjunni Gló.

Gáfust upp á biðinni eftir ferða­mönnum

Veitingastaðnum Eldsmiðjunni á Bragagötu í Reykjavík hefur verið lokað fyrir fullt og allt. Lauk þar með sögu eins elsta pítsustaðar landsins. Á síðasta ári fækkaði stöðum Eldsmiðjunnar úr fjórum í einn.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.