Handbolti

„Haldið þið virkilega að Gummi hefði bara sleppt Aroni?“

Sindri Sverrisson skrifar
Aron Pálmarsson er fyrirliði íslenska landsliðsins en er ekki með liðinu á HM vegna meiðsla.
Aron Pálmarsson er fyrirliði íslenska landsliðsins en er ekki með liðinu á HM vegna meiðsla. vísir/vilhelm

„Þetta eru bara fullorðnir menn. Þeir fara yfir málin, þetta er búið og áfram með smjörið. Ég er alveg pottþéttur á því að þannig verður þetta,“ segir Bjarni Fritzson um framtíðarsamskipti Arons Pálmarssonar og Tomasar Svensson.

Öldurnar hefur lægt eftir að Svensson, markmannsþjálfari íslenska landsliðsins, lét hafa eftir sér í sænsku viðtali að fjarvera Arons á HM gæti verið vegna samningamála eða vegna þess að Ísland myndi væntanlega ekki spila um verðlaun á mótinu.

Svensson baðst afsökunar á ummælum sínum sem sögð voru byggð á misskilningi. Aron skýrði málið betur í viðtali við RÚV í gær þar sem hann ítrekaði að hann væri vissulega meiddur og hefði farið í skoðun á Íslandi hjá lækni landsliðsins, öfugt við það sem Svensson hafði fullyrt.

Málið var til umræðu í Seinni bylgjunni á Stöð 2 Sport í gær og innslag úr þættinum má sjá hér að neðan.

„Þarna er eitthvað misræmi í gangi. Það er kannski fulldjúpt í árinni tekið að tala um trúnaðarbrest eða slíkt. Þetta var aðallega óheppilegt og klaufalegt hjá Tomasi. Hvort sem þetta er rétt eða þá að hann hafði ekki allar upplýsingar hjá sér, þá ferðu ekki í viðtal og talar um eitthvað svona,“ sagði Theodór Ingi Pálmason.

„Veit það fyrir víst að hann er meiddur“

Bjarni vísaði í viðtalið við Aron og sagði:

„Mér fannst hann nú bara skýra málið algjörlega fyrir mér. Þið vitið líka alveg hvernig Gummi Gumm er. Haldið þið virkilega að Gummi hefði bara sleppt Aroni með það að „læknarnir í Barcelona voru að segja að þetta væri svona“? Nei. Gleymið þessu.

Þetta er ekki einu sinni atriði fyrir mér. Tomas Svensson er markmaður. Það er talað um að markmenn séu einir í liði. Hefur hann ekki bara verið einn með markmönnunum? Ég held að þetta hafi bara ekki komist almennilega til tals til hans,“ sagði Bjarni.

„Þetta lítur líka illa út fyrir Aron. Svona eins og að hann hafi ekki viljað fara og sé að spila einhvern blekkingarleik. Ég veit það fyrir víst að hann er meiddur. Þessi umræða fer kannski í gang af því að hann spilar þessa tvo leiki í úrslitum Meistaradeildar Evrópu [með Barcelona á milli jóla og nýárs] en það er allt annað að spila tvo leiki og ætla svo að spila sex leiki á tíu dögum,“ sagði Theodór, og Bjarni tók við boltanum:

Með hann í liðinu hefðum við verið í dauðafæri

„Við sáum það líka í úrslitaleik Meistaradeildarinnar að hann var engan veginn heill. Þetta er okkar merkisberi, Aron Pálmarsson, og ef hann hefði verið með á þessu móti værum við í dauðafæri á að gera eitthvað. Aldrei í lífinu hefði hann verið að koma sér undan þessu móti, held ég. Þetta er eitthvað klúður hjá Tomas Svensson. Ég held að þetta hafi ekki nein áhrif á strákana úti í Kaíró, meira á strákana á skrifstofunni [hjá HSÍ]. Strákunum er drullusama.“

Klippa: Seinni bylgjan - Ummælin frá Tomasi Svensson

Seinni bylgjan er uppgjörsþáttur Stöðvar 2 Sports um Olísdeildir karla og kvenna í handbolta og er á dagskrá öll mánudagskvöld. Upptökur af þættinum má nálgast á sjónvarpsvef Stöðvar 2. Olísdeildin er hluti af Stöð 2 Sport Ísland.


Tengdar fréttir

„Trúnaðarbrestur hjá Tomasi Svensson“

Jóhann Gunnar Einarsson og Ásgeir Örn Hallgrímsson furða sig á ummælum Tomasar Svensson, markvarðaþjálfara íslenska handboltalandsliðsins, um meiðsli Arons Pálmarssonar sem er ekki með á HM í Egyptalandi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.