Getur allt gerst í milliriðlinum

„Leikurinn þróaðist vel fyrir okkur. Við komum í leikinn af kafti og það er ekkert sjálfgefið að vera yfir í hálfleik gegn þessu liði, hvað þá fimm mörkum. Þeir spila 3-3 vörn sem er ekkert grín að díla við í þriðja leik á stórmóti en við gerðum það og svo var svolítið formsatriði í seinni hálfleik að klára þetta,“ sagði Björgvin Páll við Vísi.

Eftir að hafa ekki mátt spila handbolta á Íslandi í hundrað daga vegna kórónuveirunnar, og um tíma ekki einu sinni mátt æfa með hefðbundnum hætti, hefur Haukamaðurinn nú spilað tvo leiki á þremur dögum á HM og staðið sig afar vel.

„Þetta er strembið mót, sérstaklega að spila alltaf hálftíu á kvöldin. Það er ekkert grín að ræsa fæturna en við gerðum það vel. Þetta hafa verið krefjandi verkefni, allir þessir leikir, en við förum sáttir á koddann í kvöld og ánægðir með að hafa tekið með okkur tvö stig í milliriðla,“ sagði Björgvin.

Ekki illur vilji heldur vilji til að gera vel

Þrír leikmenn Marokkó voru reknir af velli með rautt spjald í kvöld fyrir ansi gróf brot:

„Þetta er eitthvað sem maður þekkir en þetta eru engir vitleysingar. Þeir eru „all in“ og þekkja kannski ekki sín mörk. Þeir eru með mikla orku, mikinn kraft og stórt hjarta, og ætla að gera allt til að vinna andstæðinginn. Það er erfitt fyrir þá að mæta Evrópuþjóðum, þar sem reglurnar eru kannski aðeins öðruvísi og tekið harðar á brotum. Brotin voru mörg hver mjög gróf en þetta er eitthvað sem á til að gerast þegar Evrópu- og Afríkuþjóðirnar mætast. Það er ekki illur vilji í þessum brotum, bara vilji til að gera vel,“ sagði Björgvin skilningsríkur.

Framundan eru leikir við Sviss á miðvikudag, Frakkland á föstudag og Noreg á sunnudag, í milliriðlinum sem Portúgal og Alsír eru einnig hluti af. Tvö efstu liðin komast í 8 liða úrslit. Hvað segir Björgvin um framhaldið?

„Þetta eru auðvitað stórar þjóðir sem við mætum, en skemmtilegar og við þekkjum þær mjög vel. Það er gott að geta farið með tvö stig og þokkalega markatölu inn í milliriðilinn og þar getur allt gerst. Við erum bara spenntir fyrir því að taka hvert verkefni fyrir sig, erum með ungt lið sem er að slípast til og held að við séum komnir á góðan stað og getum strítt þessum liðum og gert smá usla.“