Viðskipti innlent

Umdeilt ferðamannaþorp háð umhverfismati þvert á fyrri niðurstöðu

Tryggvi Páll Tryggvason skrifar
Kynningarmynd sem sýnir fyrirhugaða uppbyggingu.
Kynningarmynd sem sýnir fyrirhugaða uppbyggingu.

Umdeilt ferðamannaþorp sem malasíski fjárfestirinn Loo Eng Wah hyggst reisa á jörðunum Leyni 2 og 3 í Rangárþingi ytra er háð umhverfismati.

Þetta er niðurstaða úrskurðarnefndar umhverfis- og auðlindamála sem fellt hefur úr gildi ákvörðun Skipulagsstofnunar um að uppbyggingin sé ekki háð umhverfismati.

Töluvert hefur verið fjallað um fyrirhugaða uppbyggingu Loo og félaga sem hann er í forsvari fyrir á svæðinu. Nágrannar hans voru í fyrstu ósáttir við hjólhýsi sem sett voru upp á tjaldsvæð í eigu félagsins. Hjólhýsin voru að lokum fjarlægð og hugmyndir kynntar í staðinn um að reisa lítil hús á svæðinu.

Lítil gistihýsi með áföstum kúluhúsum

Ráðgert var að byggja 800 fermetra þjónustuhús með verslun, veitingastað og móttöku fyrir gesti. Þá var einnig gert ráð fyrir að byggja allt að 45 gistihýsi á einni hæð, 30 allt að 60 fermetra að stærð og fimmtán allt að 20 fermetra að stærð. Að auki var fyrirhugað að byggja við hvert gisthýsi svokallað kúluhús, að hámarki 30 fermetra.

Alls var gert ráð fyrir að hægt væri að hýsa 180 gesti í húsunum. Sumarhúsa- og landeigendur í grennd við Leyni voru ekki sáttir við þessar hugmyndir, ekki síst með tilliti til vatnsverndarsjónarmiða. Töldu samtökin að ljóst væri að umræddri starfsemi myndi fylgja stórfelld losun á skólpvatni, sem gæti mengað grunnvatn á svæðinu og þaðan borist í vatnsból.

Skipulagsstofnun komst að þeirri niðurstöðu í vor að áformin væru ekki háð umhverfismati.

Samtök sumarhúsa- og landeigenda kærðu þá niðurstöðu til úrskurðarnefndar umhverfis- og auðlindamála, sem komst að niðurstöðu í málinu skömmu fyrir jól.

Telja fráveitumálin óljós

Þar segir að ákvörðun Skipulagsstofnunar hafi verið háð slíkum annmörkum að ekki verði hjá því komist að ógilda ákvörðunina. Í úrskurði nefndarinnar segir að áform framkvæmdaraðilans varðandi fráveitu hafi frá upphafi verið óljós.

 Það hafi verið hans fyrsta val að koma fyrir náttúrulegri jarðvegshreinsun á frárennsli. Síðar hafi hann þó tekið fram að leyfðu aðstæður ekki það fyrirkomulag fráveitu sem hann kysi yrði notað hefðbundið hreinsivirki.

Ekki nægjanlega upplýst að ekki yrðu af framkvæmdinni umtalsverð umhverfisáhrif

Í úrskurði nefndarinnar segir að ekki fáist séð að Skipulagsstofnun hafi heimfært áætlanir framkvæmdaraðila upp á staðhætti, hvor leiðin sem yrði farin í fráveitumálum.

Í engu hafi verið vikið að undirlagi jarðvegs á svæðinu. Hafi þó verið tilefni til þegar litið sé til þess að fyrsta val framkvæmdaraðila hafi verið að koma fyrir náttúrulegri jarðvegshreinsun á frárennsli, þótt framkvæmdasvæðið sé landbúnaðarland sem hvíli á 2-5 metra djúpum jarðvegi ofan á leku hrauni á brotabelti þar sem kortlagðar hafa verið jarðskjálftasprungur.

Því telji nefndin að Skipulagsstofnun hafi ekki séð til þess að nægjanlega væri upplýst að ekki yrðu af framkvæmdinni umtalsverð umhverfisáhrif.

Sérstaklega þegar haft sé í huga að grunnvatn sem mengast vegna ófullnægjandi fráveitu spillist um fyrirsjáanlega framtíð en nefndin bendir á að umhverfisáhrif teljist umtalsverð ef um sé að ræða „veruleg óafturkræf umhverfisáhrif eða veruleg spjöll á umhverfinu sem ekki er hægt að fyrirbyggja eða bæta úr með mótvægisaðgerðum.“

Var ákvörðun Skipulagsstofnunar því úrskurðuð ógild.


Tengdar fréttir

Loo fjarlægir umdeildu hjólhýsin

Í nýrri tillögu að deiliskipulagi jarðarinnar Leynis í Rangárþingi ytra er gert ráð fyrir því að umdeild hjólhýsi ferðaþjónustufyrirtækisins Iceland Igloo Village verði fjarlægð.

Loo segist hafa farið að öllum reglum

Framkvæmdastjóri Iceland Igloo Village hefur starfsleyfi frá Heilbrigðiseftirliti Suðurlands sem hann telur nægja til að til að leigja ferðamönnum hjólhýsi. Framkvæmdastjóri eftirlitsins segir að leyfið feli það ekki í sér, núverandi starfsemi sé ólögleg. Landeigendur hafa kært fyrirtækið.

Virði lóðanna meira en tvöfaldaðist á tveimur árum

Virði þriggja lóða sem byggingarfulltrúinn í Rangárþingi ytra keypti að Gaddstöðum fyrir tveimur árum hefur meira en tvöfaldast eftir að þeim var breytt í lóðir fyrir íbúðarhús. Mannvirkjastofnun hefur til umfjöllunar mál sem snúa að jörðinni Leyni og fær byggingafulltrúinn athugasemdir innan fárra daga.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.