Lífið

Íslenskar kvikmyndir sem beðið er eftir

Stefán Árni Pálsson skrifar
Fjölmörg spennandi verkefni á lokametrunum. 
Fjölmörg spennandi verkefni á lokametrunum. 

Á hverju ári koma út nokkrar íslenskar kvikmyndir og árið 2021 verður stórt í íslenskum kvikmyndaiðnaði.

Nokkuð margar kvikmyndir eru á leiðinni í kvikmyndahús og kannski örlítið fleiri en vanalega þar sem nánast allir kvikmyndaframleiðendur heims hafa þurft að fresta frumsýningum vegna útbreiðslu kórónuveirunnar sem veldur Covid-19 sjúkdómnum.

Á vef Kvikmyndamiðstöðvarinnar má sjá yfirferð yfir þær kvikmyndir sem eru í framleiðslu og verða líklega frumsýndar á þessu ári.

Birta í leikstjórn Braga Þórs Hinrikssonar

Hin 11 ára kraftmikla en auðtrúa Birta tekur málin í sínar hendur með ævintýralegum hætti þegar hún heyrir móður sína segja í hálfkæringi að það verði engin jól vegna blankheita.

Parið Bragi Þór og Helga Arnardóttir framleiða myndina. Tökur hófust í september á síðasta ári.

Skjálfti í leikstjórn Tinnu Hrafnsdóttur

Saga vaknar upp minnislaus á spítala eftir alvarlegt flogakast, hún veit að hún á son og áttar sig á að hún er einstæð. Þar sem hún vinnur í að ná áttum og tökum á lífi sínu fara gamlar minningar sem hún bældi ómeðvitað niður sem barn að gera vart við sig og afhjúpa sárar staðreyndir um fortíð hennar og hana sjálfa.

Aðalhlutverk: Aníta Briem, Edda Björgvinsdóttir og Jóhann Sigurðsson

Byggt á skáldsögu eftir: Auði Jónsdóttur

Dýrið í leikstjórn Valdimars Jóhannssonar

María og Ingvar búa á afskekktum sveitabæ. Þegar lítil og óvenjuleg vera kemur inn í líf þeirra verður breyting á högum þeirra sem færir þeim mikla hamningju um stund. Hamingju sem síðar verður að harmleik.

Handrit: SJÓN og Valdimar Jóhannsson

Aðalhlutverk:  Noomi Rapace, Hilmir Snær Guðnason og Björn Hlynur Haraldsson

Tökur hófust í maí 2019.

Leynilögga í leikstjórn Hannesar Þórs Halldórssonar

Grjóthörð ofurlögga í afneitum varðandi kynhneigð sína verður ástfanginn af nýja félaga sínum á meðan þeir rannsaka undarleg bankarán þar sem engu virðist vera stolið.

Handritshöfundur: Nína Petersen, Sverrir Þór Sverrisson, Hannes Þór Halldórsson

Tökur hófust í september 2020.

Aðalhlutverk: Auðunn Blöndal, Egill Einarsson, Steinunn Ólína Þorsteinsdóttir, Björn Hlynur Haraldsson.

Síðasti saumaklúbburinn í leikstjórn Rannveigar Göggu Jónsdóttur

Vinkvennahópur grípur tækifærið til að hittast og eyða helgi í sumarbústað til að styrkja vinkvennaböndin. Þær flækjast fyrir hverri annari og hafa þroskast í sitthvora áttina í gegnum árin. Uppgjör er óumflýjanlegt og allt fer til andskotans hratt og örugglega.

Handritshöfundur: Snjólaug Lúðvíksdóttir, Rannveig Gagga Jónsdóttir

Tökur hófust sumarið 2020 en um er að ræða einskonar framhald af kvikmyndinni Síðasta veiðiferðin.

Berdreymi í leikstjórn Guðmundar Arnars Guðmundssonar

Ungur strákur tekur eineltisfórnarlamb inn í hóp af ofbeldisfullum villingum. Í gegnum nýju vináttuna nær strákurinn að stíga út úr hringrás ofbeldisins og finna sinn rétta farveg.

Aðalhlutverk: Birgir Dagur Bjarkason, Áskell Einar Pálmason, Viktor Benóný Benediktsson, Snorri Rafn Frímannsson.

Tökur hófust í ágúst 2020.

Wolka í leikstjórn Árna Ólafs Ásgeirssonar

Hin 32 ára Anna fær reynslulausn úr fangelsi í heimalandi sínu Póllandi þar sem hún hefur afplánað 15 ára dóm fyrir morð. Frelsinu fegin ákveður Anna að fórna öllu með því að brjóta skilorð sitt og ferðast til Íslands þar sem hún þarf að horfast í augu við fortíð sína.

Aðalhlutverk: Olga Bołądź, Eryk Lubos, Anna Moskal

Handrit: Árni Ólafur Ásgeirsson, Michal Godzic

Svar við bréfi Helgu í leikstjórn Ásu Helgu Hjörleifsdóttur

Aldraður bóndi skrifar bréf til ástkonunnar sem honum bauðst að fylgja forðum tíð. Gerði hann rétt að taka skyldur sínar við sveit og eiginkonu fram yfir ástina, eða sveik hann þannig sitt eigið hjarta?

Aðalhlutverk: Hera Hilmarsdóttir, Þorvaldur Davíð Kristjánsson, Aníta Briem, Björn Thors

Tökur hófust í ágúst 2020.

Sumarljós og svo kemur nóttin í leikstjórn Elfars Aðalsteins

Ef þú leggur við hlustir þá segir Þorpið þér kannski nokkrar ósagðar sögur. Sögur af forstjóranum unga sem dreymir á latínu og fórnar fjölskyldu og glæstum frama fyrir gamlar bækur og stjörnukíki, heljarmenni sem kiknar undan myrkrinu, fínvöxnum syni hans sem tálgar mófugla. Af bóndanum með bassaröddina sem strengir fallegar girðingar en ræður illa við fýsnir holdsins, einmana gröfukalli sem skellir sér í helgarferð til London og gömlum Dodge 55.

Byggt á skáldsögu eftir Jón Kalman Stefánsson

Tökur hófust í ágúst 2020.

Alma í leikstjórn Kristínu Jóhannesdóttur

Alma er örlagagasaga ungrar konu sem er lokuð inni á réttargeðdeild eftir að hafa játað á sig morð á kærasta sínum án þess þó að muna eftir þeim atburði. Eftir sjö ár berast þær fréttir að kærastinn sé sprelllifandi og á leið til landsins. Hún ákveður að drepa hann þar sem hún er hvort sem er búin að afplána dóm fyrir glæpinn.

Aðalhlutverk: Snæfríður Ingvarsdóttir, Kristbjörg Kjeld, Emmanuelle Riva (Amour), Hilmir Snær Guðnason




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.