Ísland auki viðleitni í mansalsmálum

Skýrsla frá bandaríska utanríkisráðuneytinu segir að hér á landi séu konur fórnarlömb kynlífsmansals og bæði kyn séu seld vinnumansali. Konur frá Austur-Evrópu, Eystrasaltsríkjunum, Vestur-Afríku og Brasilíu séu seldar kynlífsmansali, oftast á næturklúbbum og börum.

Þá tíðkist vinnumansal í byggingariðnaði, fiskverkunum, ferðaþjónustu, veitingastöðum og í sambandi við au pair í heimahúsum. Í skýrslunni segir að þrælahaldarar misnoti reglur um frjálsa för fólks í gegnum Schengen-samstarfið og Evrópska efnahagssvæðið og nýti sér að hér geti fólk dvalið í þrjá mánuði án dvalarleyfis. Mansal sé ákaflega sjaldan tilkynnt til lögreglunnar.

Skýrsla bandaríska utanríkisráðuneytisins flokkar Ísland í sterkasta flokkinn af fjórum þegar kemur að mansali. Ísland var í öðrum flokki fram til ársins 2011 þegar það tók stökk vegna viðleitni yfirvalda til að vinna bug á mansali. Öll Norðurlöndin eru í sama flokki og Ísland.

Skýrsluhöfundar leggja til að íslensk yfirvöld auki verulega viðleitni sína til að ákæra og dæma þrælahaldara og auki fræðslu fyrir alla sem innan réttarvörslukerfisins starfa.