Willum: Þeir voru betri á öllum sviðum

Willum Þór Þórsson þjálfari Keflavíkur sagði að sitt lið hefði verið tekið taktískt í bólinu af Valsmönnum.

„Þetta var þungt hjá okkur og Valsararnir voru bara betri en við í dag. Voru taktískt sterkir og teymdu okkur fram á völlinn. Voru hraðir og markvissir í sínum aðgerðum," sagði willum.

Sigur Valsmanna var síst of stór og willum tók undir það.

„Ég er alveg sammála því. Þeir voru betri á öllum sviðum og við í brasi með varnarleikinn. Þetta var það slakasta sem við höfum sýnt varnarlega í sumar."

Heimavöllur Keflvíkinga hefur reynst þeim góður í gegnum tíðina og undarlegt að sjá liðið yfirspilað þar.

„Við vorum taktískt teknir í bólinu. En ég veit ekki hversu mikið vígi völlurinn er. Við höfum ekki spilað á honum í mánuð og ekki æft á honum. Auðvitað á Keflavíkurvöllur að vera okkur vígi en Valsliðið var bara betra liðið í dag" sagði Willum.

Framundan er bikarleikur gegn KR á sunnudag en það er stutt á milli leikja hjá Keflvíkingum líkt og hjá öðrum liðum þessa dagana.

„Það er þriðji leikurinn á sex dögum og svo bætist fjórði leikurinn við á níu dögum. Þú spilar ekkert í mánuð og svo koma fjórir leikir á níu dögum. Þetta er mjög sérstakt prógram," sagði Willum sem segir erfitt fyrir leikmenn að jafna sig á tveimur dögum.

Keflvíkingum gengur lítið þessa dagana og Willum segir óskandi að hægt verði að styrkja liðið þegar félagsskiptaglugginn opnar um miðjan júlí.

„Ég vildi óska þess að við hefðum ráðrúm og fjárhagslega burði til þess að styrkja liðið. Við fórum lágstemmdir inn í mótið en ég held við verðum að gera okkur grein fyrir raunveruleikanum. Vonandi getum við styrkt liðið fyrir þá baráttu sem við erum að fara að heyja," sagði Willum að lokum.