Díana óttaðist um líf sitt

Bréf sem Díana Prinsessa skrifaði og innihélt fullyrðingar um að Karl Bretaprins skipulagði "bílslys" þar sem hún ætti að deyja var gert opinbert í fyrsta skipti í gær.

Díana skrifaði bréfið í október 1996 þar sem hún varaði við því að eiginmaður sinn vildi hana feiga til þess að hann gæti gifst barnfóstru þeirra. Díana var fullviss um að Karl ætti í sambandi við Tiggy Legge-Bourke og hefði barnað hana. Díana lét einkaþjón sinn Paul Burrell fá bréfið en hann birti það í bók sinni sem kom út árið 2003.

Í bréfinu skrifaði Díana: „Ég sit hérna við skrifborðið mitt í október og vona að einhver komi og taki utan um mig og styrki mig. Þessir ákveðnu hlutir í lífi mínu eru mjög hættulegir. Eiginmaður minn er að skipuleggja "bílslys" þar sem bremsurnar eiga að klikka og ég fái alvarleg höfuðmeiðsli svo hann geti gifst Tiggy. Camilla er ekkert nema tálbeita"

Lucia Flecha da Lima var náin vinkona Díönu og hún efast um að bréfið sé alvöru. Fyrir dómi í gær talaði hún frá Brasilíu og sagði: "Paul Burrell var fullfær um að falsa rithönd Díönu." Hún sagði einnig að Díana hefði líklega sagt sér ef hún væri hrædd um líf sitt.

Ekkert hefur komið fram sem bendir til þess að Tiggy, sem gætti Vilhjálms og Harry, hafi átt í sambandi við Karl Bretaprins né að hún hafi gengið með barn þeirra.