Sagði árásina fyrir Sýrland

Maðurinn sem særði þrjá í hnífstunguárás í Lundúnum í gærkvöldi sagðist hafa gert það fyrir Sýrland. Hann réðist á fólk af handahófi að sögn sjónarvotta, og á farsímaupptöku má sjá hann hóta öðru fólki áður en lögreglu tókst að yfirbuga hann með rafbyssu.

Árásin átti sér stað á Leytonstone lestarstöðinni í austur London um klukkan sjö í gærkvöld. Einn særðist alvarlega en hinir tveir eru ekki í lífshættu, að sögn breskra lögregluyfirvalda. Hún er rannsökuð sem hryðjuverk, en þetta er fyrsta hryðjuverkaárásin í Bretlandi síðan í maí 2013.

Myndskeið eru tekin að birtast af árásinni og á einu þeirra má sjá stóra blóðpolla við miðasölu stöðvarinnar. Þá hefur lögregla beðið þá sem eiga upptöku af árásinni að gefa sig fram.

Einungis nokkrir dagar eru síðan loftárásir Breta í Sýrlandi hófust, eftir að þær voru samþykktar í breska þinginu.