Lifandi líffæragjafar á Íslandi bera mikinn kostnað af gjöf sinni

Lifandi líffæragjafar á Íslandi geta orðið fyrir miklum fjárhagslegum skakkaföllum því þeir þurfa að taka á sig stærstan hlutann af allri launaskerðingu vegna aðgerða sem þeir gangast undir. Réttur lifandi nýrnagjafa er mjög óljós á Íslandi segir Runólfur Pálsson, yfirlæknir á Landspítalanum.

Yfirlæknir nýrnalækninga á Landspítalanum vill að ríkið komið með miklu afdráttarlausari hætti að málefnum lifandi nýrnagjafa en gerst hefur fram til þessa.

Pólverjinn Irek Gluchowksi bíður nú eftir nýra hér á landi, en hann fékk alvarlega sýkingu hér, sem leiddi til þess að bæði nýrun skemmdust og taka þurfti neðan af báðum fótum hans.

Íslenskur karlmaður vill gefa Pólverjanum annað nýra sitt en Íslendingurinn má jafnvel reikna með að það geti reynst honum kostnaðarsamt.

Runólfur Pálsson læknir segir að ríkið verði hreinlega að létta undir með þeim sem gefa nýru en verulegur kostnaður getur lent á þeim sem gefa slík líffæri.

Runólfur Pálsson segir að lifandi nýrnagjafar séu algerlega háðir velvilja vinnuveitenda sinna þegar þeir þurfi að vera frá vinnu allt upp í tvo mánuði eftir aðgerð. Hann segir að sjálfstæðir atvinnurekendur, eins og tannlæknar og iðnaðarmenn, hafi engar tekjur þann tíma sem þeim sé ekki unnt að vinna í framhaldi af líffæragjöfinni. Það eina sem nýrnagjafar eigi rétt á séu sjúkradagpeningar sem séu í nær öllum tilvikum langt undir launum.

Runólfur segir að um gríðarlega stóra gjöf sé að ræða þar sem líffæragjafinn þurfi að gangast undir skurðaðgerð í þágu annars. Um hundrað lifandi Íslendingar hafa gefið nýru og gengist undir aðgerð en þeir eru um tveir þriðju af öllum nýrnagjöfum hérlendis undanfarin ár.

Runólfur segir að ígræðslan sé ekki bara mikilvæg fyrir líffæraþegann því samfélagið hagnist allt þar sem meðferð sjúklingsins verði margfalt ódýrari á eftir.