Tveir mikilvægir á Laugardalsvelli

Það hefur nokkuð verið skrifað um vínveitingar á íþróttasvæðum á umliðnum árum, m.a. hvort leyfa eigi sölu á léttu víni og bjór á Laugardalsvelli. Ég ætla ekki að skrifa um það.

Ég ætla að skrifa um það þegar Ron Saunders, framkvæmdastjóri Aston Villa, gat leyft sér það að „stúta“ úr einum pela af „Whisky“ á meðan Evrópuleikur Vals og Aston Villa fór fram fyrir rúmum þrjátíu árum síðan.

Blaðamennirnir sem fjölluðu um leikinn tóku svona til orða því Saunders sást súpa við og við á bekknum af pelanum, en það þótti ekki tiltökumál því það var haust og þessi rosalegi árans norðanstrekkingur á Laugardalsvelli. Sagt var í umfjöllun að þeir nær 4.000 áhorfendur sem voru á leiknum hafi verið nær króknaðir af kulda.

Við vorum nokkur saman á leiknum og þegar við gengum heim, upp í Hlíðar, með kuldabolann upp úr og niður úr, þá vorum við ófá sem hétum því að fara aldrei aftur á leik að hausti í skítakulda. Það loforð er fyrir löngu margbrotið, bæði á Laugardalsvelli, í Kaplakrika og á fleiri knattspyrnuvöllum. Því þó að það blási vindar og himnarnir gráti þá þarf fólk að vera til staðar á vellinum til að fylgjast með knattspyrnunni. Án áhorfenda hefur leikurinn einfaldlega minna vægi.

En af hverju að vera að rifja þetta upp núna þegar Íslandsmótið er búið bæði í karla- og kvennaflokki. Jú, það eru nefnilega tveir mikilvægir leikir eftir á Laugardalsvelli og þeir verða spilaðir jafnvel þó að það verði norðanstrekkingur.

Strákarnir byrja þriðjudaginn 16. október kl. 18.30, nýkomnir frá Albaníu, og spila gegn feiknasterku liði Sviss í undanriðli HM 2014. Stelpurnar mæta svo á völlinn fimmtudaginn 25. október kl. 18.30 til að spila síðari leik sinn við Úkraínu í umspilinu um sæti í lokakeppni Evrópumótsins 2013.

Í baráttunni fram undan þurfa stelpurnar og strákarnir á stuðningi okkar að halda og þau eiga hann líka skilinn. Við sjálf getum stuðlað að betri árangri hjá landsliðunum okkar með því að styðja þau allan ársins hring.

Leikmenn munu ekki láta það á sig fá þó svo að það verði kalt og blautt á Laugardalsvelli á keppnisdegi. Þau mæta til leiks, sama hvernig viðrar og leikmennirnir vilja svo sannarlega að fólkið mæti á völlinn og hvetji liðið sitt áfram. Þrátt fyrir það að Ron Saunders muni ekki ganga um stúkuna með „Whisky“ pela, þá hvet ég alla knattspyrnuvini til að koma á Laugardalsvöll, sama hvernig viðrar. Það skiptir liðin máli. Áfram Ísland.