Giggs ætlar í þjálfun að ferlinum loknum

Ryan Giggs segist ætla að snúa sér að knattspyrnuþjálfun þegar að ferli hans lýkur en Giggs er 34 ára gamall.

Hann lék sinn 100. Evrópuleik fyrir Manchester United í gær er liðið gerði 1-1 jafntefli við Lyon í Meistaradeild Evrópu.

Giggs mun hefja nám sitt fyrir UEFA-A þjálfaragráðu sína nú í sumar að sögn Osian Roberts hjá knattspyrnusambandi Wales.

„Ryan hefur gefið til kynna að hann vilji koma með okkur til Aberystwyth í júní í sumar og taka UEFA-A þjálfaragráðuna. Það eru frábærar fréttir fyrir okkur í Wales og frábærar fréttir fyrir knattspyrnuna að maður á hans stalli verði áfram í íþróttinni."

Margir fyrrum leikmenn Manchester United hafa snúið sér að þjálfun og eru þekktir knattspyrnustjórar í dag. Meðal þeirra má nefna Gordon Strachan, Steve Bruce, Paul Ince og Mark Hughes sem er einnig frá Wales.