Launakostnaður hækkaði um 50 milljónir

Kostnaður vegna launa og launatengdra gjalda hjá Landsbréfum nam 382 milljónum króna á síðasta ári og hækkaði um 50 milljónir. Þar af nemur kostnaður vegna launa 290 milljónum, en hann var 244 milljónir árið áður.

Meðalstarfsmannafjöldi á árinu var nítján en að auki eru þrír stjórnarmenn á launaskrá. Framkvæmdastjóraskipti urðu hjá Landsbréfum þegar Helgi Þór Arason tók við af Sigþóri Jónssyni í byrjun júní. Helgi var áður forstöðumaður Markaðsviðskipta í Landsbankanum.

Landsbréf skiluðu 188 milljónum króna í hagnað á liðnu ári, sem svarar til tæplega 10,3% arðsemi eigin fjár.

Í afkomutilkynningu sem send var Kauphöll Íslands fyrr í vikunni kemur fram að hreinar rekstrartekjur Landsbréfa námu 1.104 milljónum króna samanborið við 969 milljónir króna rekstrarárið 2013. Eigið fé Landsbréfa í árslok nam um 1.832 milljónum króna en var 1.644 milljónir króna í lok árs 2013.

„Sjóðir Landsbréfa skiluðu fjárfestum almennt góðri ávöxtun á árinu 2014 og rekstur Landsbréfa skilaði eigendum sínum góðri arðsemi,“ sagði í tilkynningu.