Hver verður fyrstur í 100 sigurleiki?

Guðjón Þórðarson (þjálfari Grindavíkur), Bjarni Jóhannsson (þjálfari Stjörnunnar) og Logi Ólafsson (þjálfari Selfoss) verða í sviðsljósinu með lið sín í 2. umferð Pepsi-deildar karla í kvöld.

Allir eiga þeir það sameiginlegt að vera inni á topp fjögur lista yfir sigursælustu þjálfarana í efstu deild karla og nú er spurningin hver þeirra verður fyrstur til að komast í 100 sigurleikja hópinn með Ásgeiri Elíassyni.

Ásgeir varð fyrstur til að stýra liði til sigurs í 100 leikjum í efstu deild sumarið 1997 og hefur enn 21 sigurleik í forskot á Guðjón Þórðarson. Guðjón vann sinn 99. leik 20. maí 2008 og hefur nú stýrt liðum í tíu leikjum í röð án þess að ná hundraðasta sigrinum í hús.

Bjarni og Logi hafa báðir unnið 98 leiki sem þjálfarar í efstu deild en Logi var sá eini af þeim þremur sem stýrði liði til sigurs í fyrstu umferðinni.

Flestir sigrar þjálfara í efstu deild:

Ásgeir Elíasson 120

Guðjón Þórðarson 99

Bjarni Jóhannsson 98

Logi Ólafsson 98

Willum Þór Þórsson 88

Jóhannes Atlason 80

Hólmbert Friðjónsson 79

Hörður Helgason 74

Óli B. Jónsson 73

Ríkharður Jónsson 70