Kielsen kynnti olíukóngum Texas útboð Grænlendinga

Grænlensk stjórnvöld hafa kynnt áætlun um að bjóða út olíuleit á fimm svæðum á næstu tveimur árum, þar á meðal á tveimur við Austur-Grænland, þeirri hlið sem snýr að Íslandi. Kim Kielsen forsætisráðherra hleypti fyrsta útboðinu af stokkunum í Texas á dögunum. Fjallað var um málið í fréttum Stöðvar 2. 

Kim Kielsen valdi Houston í Texas til að vekja athygli bandarískra olíuforstjóra á nýjum olíuútboðum Grænlendinga með sérstakri kynningu grænlenskra stjórnvalda í borginni sem kölluð hefur verið olíuhöfuðborg heimsins. Samsvarandi kynning var jafnframt haldin í London.

Fyrsta útboðssvæðið núna í febrúar er Nuussuaq norðan Diskó-flóa. Í september verða boðin út svæði á Davíðssundi og Baffinsflóa. Sumarið 2021 verður svæði á Norðaustur-Grænlandi boðið út og í janúar 2022 kemur röðin að Miðaustur-Grænlandi. 

Kim Kielsen segir í yfirlýsingu vegna útboðanna að mikilvægt sé að styrkja tekjustofna Grænlands svo unnt sé að styrkja lífsskilyrði í landinu. Á sama tíma sé spáð aukinni olíu og gasvinnslu í heiminum á næstu árum. Grænlendingar hafi sama rétt og aðrir til að vinna og flytja út olíu og gas. Nýting á olíu og gasi geti stuðlað að auknum viðskiptum og tekjum landsins.

Kim tekur fram að með byggingu vatnsaflsvirkjana og fleiri endurnýjanlegra orkugjafa styðji Grænland alþjóðleg loftlagsmarkmið. Olíuleitin muni fara fram í samræmi við ströngustu alþjóðlegu staðla á svæðinu. 

Danska ríkisútvarpið DR kallar olíuleitaráætlun Grænlendinga sókndjarfa. Grænlenski fréttamiðilinn Sermitsiaq bendir á að með því að stefna á olíuboranir á landi sé ætlunin að laða að minni olíufélög. Þá segir KNR málið umdeilt í Danmörku. Einn af stuðningsflokkum dönsku stjórnarinnar, rauðgræni flokkurinn Enhedslisten, hafi gagnrýnt útboðið, sem og Greenpeace á Norðurlöndunum. 

Hér má sjá frétt Stöðvar 2: