Viðskipti erlent

Engin umsókn barst í olíuleit við Færeyjar

Kristján Már Unnarsson skrifar
Borpallur á Skálafirði í Færeyjum haustið 2014 að lokinni borun níundu holunnar á landgrunni eyjanna. Hann kom til viðhalds í Rúnavík.
Borpallur á Skálafirði í Færeyjum haustið 2014 að lokinni borun níundu holunnar á landgrunni eyjanna. Hann kom til viðhalds í Rúnavík. Atlantic Supply Base/Eli Lassen.

Engin umsókn barst um sérleyfi til olíuleitar á landgrunni Færeyja í fimmta útboði færeyskra stjórnvalda, en útboðsfrestur rann út í vikunni. Þetta er annað útboðsferlið í röð sem reynist árangurslaust en í fjórða útboðinu í fyrra barst aðeins ein umsókn, sem síðar var dregin til baka.

„Það er á hreinu að við ætlum ekki að gefast upp hér,“ sagði Helgi Abrahamsen, atvinnumálaráðherra Færeyja, í viðtali við Kringvarpið. Hann sagði að boðið yrði upp á „open door“, sem þýðir að olíufélögum verður frjálst að sækja um hvenær sem er. Þá yrði stefnt á nýtt útboð, þó ekki alveg á næstu misserum. 

Ráðherrann taldi þetta áhugaleysi skýrast af því að olíufélög væru treg að stíga það stóra skref að fara inn á ný svæði. Hann benti á að þótt engin umsókn hafi borist hafi nokkur félög sýnt útboðinu áhuga og sótt gögn.

Höfnin í Rúnavík hefur verið nýtt sem olíuþjónustumiðstöð. Atlantic Supply Base/Eli Lassen.

„Þetta eru ekki endalokin á færeyska olíuævintýrinu því öllum er ljóst að olía og gas finnst á færeyska landgrunninu,“ sagði Niels Christian Nolsøe, forstöðumaður Jarðfeingis, þeirrar stofnunar Færeyinga sem annast orkumál. 

Hann segir í viðtali á Portal.fo að of stuttur tími kunni að hafa liðið milli fjórða og fimmta útboðsins. Jarðfeingi hefði ekki haft nægilegan tíma til að kynna olíufélögum færeyska landgrunnið. Þá hefur verið bent á að færeysk skattalög geri ráð fyrir hærri skattheimtu af olíuvinnslu en bresk lög.

Á kortinu má sjá, merkt með grænu og rauðu, þær olíu- og gaslindir sem fundist hafa vestur af Hjaltlandseyjum, skammt frá lögsögumörkum Færeyja. Einnig sjást staðirnir þar sem búið er að bora á landgrunni Færeyja. Kort/Jarðfeingi.

Færeysk stjórnvöld drifu útboðið í gang til að hafa það samtímis útboði breskra stjórnvalda við Hjaltlandseyjar í von um að olíufélög sæju sér hag í því að fá leyfi beggja megin miðlínunnar. Miklar olíulindir hafa á undanförnum árum fundist Bretlandsmegin, örstutt frá lögsögumörkum Færeyja. 

Á undanförnum tuttugu árum hafa alls níu holur verið boraðar á færeyska landgrunninu. Þótt vottur af olíu hafi fundist hefur enn ekki fundist þar olíulind í vinnanlegu magni.

Hér má sjá frétt Stöðvar 2 í vor þegar Lögþing Færeyja samþykkti einróma nýtt olíuleitarútboð:


Tengdar fréttir

Færeyingar mættir til olíukónganna í Texas

Færeysk stjórnvöld markaðssetja nú nýjasta olíuleitarútboð sitt á alþjóðavettvangi. Færeyingar vilja ná athygli olíuforstjóra sem völd hafa til að taka ákvarðanir um dýrar olíuboranir á úthöfum.

Stóri borinn á leið til Færeyja

Olíuborpallurinn Cosl Pioneer er nú á leið á færeyska landgrunnið til að vinna stærsta verkefni í atvinnusögu Færeyja; borun allt að fimm kílómetra djúprar holu fyrir 20 milljarða króna. Ef borinn hittir á það, sem olíufélög telja að þarna leynist undir, gætu Færeyingar á næstu árum orðið ein auðugasta þjóð veraldar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ICEAIR
2,84
50
304.659
BRIM
0,9
4
13.951
REITIR
0,54
6
97.741
EIM
0,53
3
22.430
MAREL
0,49
15
329.308

Mesta lækkun dagsins


Félag
Br.%
Fjöldi
Velta*
ORIGO
-1,82
5
37.198
KVIKA
-1,49
6
94.217
ICESEA
-0,92
5
8.654
SYN
-0,91
3
26.200
HEIMA
-0,86
4
3.247
Velkomin á Vísi. Þessi vefur notar vafrakökur. Sjá nánar.