Hækkun matarskatts lítil áhrif haft á magn matarinnkaupa

Nýtt ár hófst með töluvert aukinni veltu í sérvöruverslunum miðað við sama tíma í fyrra en sala í dagvöruverslun í janúar var nánast óbreytt að raunvirði frá janúar í fyrra. Hækkun á lægra þrepi virðisaukaskatts virðist því ekki hafa haft teljandi áhrif á magn matarinnkaupa á heildina litið. Hugsanlega urðu þó einhverjar breytingar á milli einstakra flokka matvæla. Þetta kemur fram í tilkynningu frá Rannsóknarsetri verslunarinnar.

Ekkert lát á vexti í sölu snjallsíma

Meira en þriðjungsaukning varð á sölu raftækja í janúar frá sama mánuði í fyrra, eða um 42 prósent. Aukningin varð mest í veltu minni raftækja, eins og sjónvörpum og hljómflutningstækjum. Þá hafði afnám vörugjalda um áramótin einnig góð áhrif á sölu stærri raftækja eins og þvottavéla, kæliskápa o.fl þar sem söluaukningin nam 37 prósentum miðað við sama mánuð í fyrra. Þá er ekkert lát á vexti í sölu snjallsíma, eða um 35 prósent.

Þá voru janúarútsölur fataverslana mun líflegri en í janúar í fyrra. Veltuaukning fataverslana í mánuðinum nam 10,5 prósent að raunvirði og verð á fötum var 6,1 prósenti lægra en tólf mánuðum fyrr.

Enn langt í land

Húsgagnaverslun jókst einnig jafnt og þétt allt síðasta ár og var veltan næstum 14 prósentum meiri en fyrir ári síðan. Hún á þó enn töluvert langt í land með að ná þeim hæðum sem húsgagnasala var fyrir hrun. Velta húsgagnaverslana var 31 prósent minni en í janúar 2008. Þá voru minni sveiflur í byggingavöruverslunum milli ára, en aukningin nam um tveimur prósentum á milli ára.