Raftækjum og húsgögnum mokað út í nóvember

Jólaverslun er almennt sögð hafa farið vel af stað í nóvember og líklegt talið að töluvert sé um að heimilin endurnýi hjá sér raftæki og húsgögn.

Rannsóknasetur verslunarinnar spáir um fjögurra prósenta raunvexti í verslun fyrir þessi jól. Veruleg aukning varð í nóvember í sölu á varanlegum neysluvörum á borð við stór raftæki og húsgögn, að því er fram kemur í nýrri samantekt Rannsóknaseturs verslunarinnar á Bifröst.

„Sala á snjallsímum jókst um 168,8 prósent á föstu verðlagi í nóvember miðað við sama mánuð í fyrra sem er fyrst og fremst vegna þess að hafin var sala á nýrri útgáfu snjallsíma í byrjun mánaðarins,“ segir í umfjöllun RSV.

Sala húsgagna jókst um 26,6 prósent og þar af jókst sala á rúmum um 45,7 prósent. „Velta í sölu á stórum raftækjum eins og þvottavélum og ísskápum, svokölluðum hvítvörum, jókst um 30,4 prósent og sala á minni raftækjum, sjónvörpum og hljómflutningstækjum um 22,1 prósent.“

Velta í dagvöruverslun jókst lítillega í nóvember og samdráttur varð í sölu áfengis miðað við sama mánuð í fyrra. Þó er tekið fram að í fyrra voru fimm föstudagar í nóvember en nú voru þeir fjórir.

„Föstudagar eru söluhæstu dagarnir í þessum vöruflokkum.“ Þegar leiðrétt hefur verið fyrir þessum dagamun kemur í ljós að velta dagvöru jókst um 2,2 prósent og áfengis um 3,8 prósent.