Voru valdir úr 900 manna hópi

„Það má alveg segja að við séum alveg að verða ballettdansarar en við erum samt allir jafn góðir,“ segir hinn 13 ára gamli Baldvin Alan Thorarensen en hann mun ásamt, hinum 12 ára gamla Sölva Viggóssyni Dýrfjörð og hinum 11 ára gamla Hirti Viðari Sigurðarsyni leika ballettdansarann Billy Elliot í nýrri uppfærslu í Borgarleikhúsinu í vetur undir leikstjórn Bergs Þórs Ingólfssonar.

„Við erum búnir að vera í stífum ballettæfingum í sumar og erum orðnir mjög vöðvaðir og massaðir, þetta er ótrúlega erfitt,“ segir Hjörtur Viðar og hlær. Þeir hafa ekki eingöngu lært dans, því þeir hafa einnig lært leiklist, söng, fimleika og djassballett. „Þeir þoldu þetta allir mjög vel og eru að ná mjög góðum árangri,“ segir Bergur Þór leikstjóri.

Strákarnir eiga það einnig sameiginlegt að koma úr samkvæmisdönsum. „Þetta eru allt öðru vísi hreyfingar en í samkvæmisdansinum því þar eru tveir að dansa saman en í ballettinum ertu bara einn,“ segir Baldvin.

Í upphafi komu um 900 strákar í prufur til að fá að leika Billy Elliot og var þrisvar sinnum sigtað út en á endanum var sex piltum boðið í Billy-sumarskólann. Baldvin, Sölvi og Hjörtur urðu þó að lokum fyrir valinu sem Billyar Borgarleikhússins. Chantelle Carey og Elizabeth Greasley hafa að mestu séð um dansþjálfunina en þær hafa báðar unnið við hina ýmsu söngleiki í West End í London. Strákarnir þrír munu skipta sýningunum á milli sín. „Við munum skiptast á, ef einhver verður lasinn og svo er þetta líka bara mjög erfitt,“ segir Sölvi.

Billy Elliot verður frumsýnt í mars en eru piltarnir ekkert stressaðir fyrir því að stíga á stóra sviðið í Borgarleikhúsinu? „Jú, við erum dálítið stressaðir en við hlökkum samt líka ótrúlega mikið til,“ segir Baldvin og þá bætir Hjörtur við: „Mig dreymdi einu sinni að ég væri að leika á sviði og ég fékk næstum því bara spennufall.“ Þeir hafa þó allir leikið í skólaleikritum áður.

Billy Elliot er boxari að upplagi en strákarnir hafa þó ekki enn farið í boxþjálfun. „Við höfum ekki farið í boxkennslu enn þá en förum líklega í hana þegar nær dregur,“ segir Baldvin sem kannast þó aðeins við bardagaíþróttirnar eftir að hafa æft karate. Strákarnir munu æfa stíft fram að frumsýningu.