Serbía vann slaginn gegn Króatíu

Serbía og Króatía áttust við í hörkuleik í átta liða úrslitum körfuboltans á ÓL í nótt en þetta var lokaleikur átta liða úrslitanna.

Leikurinn var jafn og spennandi en endaði með þriggja stiga sigri Serbanna, 86-83.

Bogdan Bogdanovic skoraði 18 stig fyrir Serbana og þeir Stefan Markovic, Miroslav Radjulica og Nikola Jokic skoruðu allir 12 stig. Hinn magnaði Milos Teodosic skoraði 9 stig og gaf 10 stoðsendingar.

Bojan Bogdanovic var allt í öllu í liði Króatana en hann skoraði 28 stig. Mario Hezonja skoraði 16.

Serbía mun spila við Ástralíu í undanúrslitunum en í hinum leiknum mætast Spánn og Bandaríkin. Leikirnir fara fram á morgun.