Geir: Ef fólk vill gagnrýna okkur, þá bara gerir fólk það

Guðjón Guðmundsson hitti Geir Sveinsson, landsliðsþjálfara Íslands í handknattleik, í Laugardalshöllinni. En íslenska liðið undirbýr sig nú að kappi fyrir leik Íslands og Makedóníu sem fram fer annað kvöld.

Ísland hefur harma að hefna eftir tap gegn Makedóníu ytra á fimmtudaginn, 30-25. Geir sagði að þrátt fyrir að liðið hafi ekki verið að spila nægilega vel á köflum, þá var liðið inni í leiknum þar til 5 mínútur voru eftir.

„Þá vantaði okkur að nýta okkur þau tækifæri sem gáfust og það hefði kannski getað skilað okkur einu stigi. Fimm mörk voru að mínu viti of mikið. En við breytum því ekkert. Við þurfum að vinna í því núna, á þessum stutta tíma sem við höfum, að laga þau atriði sem miður fóru og vonandi tekst okkur það,“ sagði Geir.

Geir viðurkenndi að vörnin hafi ekki verið nægilega góð í leiknum ytra.

„Það vantaði kannski svolitla forvinnu, sérstaklega gagnvart línumanninum. Og svo létum við teyma okkur svolítið út í hluti sem voru óþægilegir fyrir okkur. Sem gerði það verkum að við fundum ekki taktinn fyrstu 20 mínúturnar. En auðvitað ljóst að við verðum að ná vörninni upp á morgun, það er lykilatriði,“ sagði Geir.

Geir hefur verið að gefa nýjum og ungum leikmönnum tækifæri. Margir hafa sagt að fleiri eigi að fá tækifæri og vilja hjá enn rótækari breytingar á liðinu.

„Ég er auðvitað ánægður með að sjá okkur spila í Skopje, í troðfullri höll, brjáluð stemning á móti góðu makedónsku liði og við erum með Janus, Arnar og Ómar Inga inn á. Allir í kringum tvítugt. Þetta er það sem við erum að vinna í. Ég tel að við séum á réttri leið, með þennan hóp sem við erum með,“ segir Geir.

Viðtalið í heild sinni má sjá í spilaranum.