Dæmi um að íþróttafélög virði ekki samkomubann - 50 manna æfing

Minnst fjórar tilkynningar um brot á samkomubanni hjá íþróttafélögum hafa borist almannavarnadeild ríkislögreglustjóra síðan bannið var sett á.

Þetta kom meðal annars fram í máli Víðis Reynissonar á daglegum upplýsingafundi almannavarnadeildar í dag.

„Ég er fúll. Við fengum helling af tilkynningum síðastliðna nótt og í dag. Þar sem verið var að benda á ákveðna staði þar sem eitthvað hafði verið að gerast.“

„Svo erum við með allavega fjórar tilkynningar varðandi starfsemi íþróttafélaga þar sem æfingar voru í gangi. Við erum með upplýsingar um að það hafi verið 50 manna æfing hjá íþróttafélagi. Það er alveg ótrúlegt,“ segir Víðir.

Þann 20.mars síðastliðinn fyrirskipaði ÍSÍ (Íþrótta- og Ólympíusamband Íslands) að frá og með 22.mars skyldi allt skipulagt íþróttastarf hér á landi leggjast af.

Hafa mörg íþróttafélög brugðist við með því að senda iðkendum sínum æfingar sem hægt er að gera í einrúmi en miðað við orð Víðis gildir það ekki um öll félög.