Lífið

Einstakar hestamyndir Gígju enduðu á lúxushóteli og tískufatnaði

Sylvía Rut Sigfúsdóttir skrifar
Gígja hefur róandi áhrif á hestana og eftir augnablik hætta þeir að taka eftir henni.
Gígja hefur róandi áhrif á hestana og eftir augnablik hætta þeir að taka eftir henni. Vísir/Hestalífið

Ljósmyndarinn Gígja Einarsdóttir hefur síðustu ár fangað einstök augnablik af íslenska hestinum í sínu náttúrulega umhverfi. Myndir hennar hafa meðal annars birst á veggjum lúxushótela og fatnaði og vörum frá þekktum tískuvörumerkjum eins og H&M og Urban Outfitters. Telma Lucinda Tómasson kynnir áhorfendur fyrir Gígju í mannlífsþættinum Hestalífið.

Frá lúxushóteli í Kasakstan.Aðsend mynd

Hesturinn er einstaklega falleg og kraftmikil skepna og hefur heillað listamenn frá örófi alda. Hann er viðfang meðal annars í fornum hellaristum, teikningum frá miðöldum og óteljandi ljósmyndum, eftir að sú tækni kom til. Gígja er fjölhæfur ljósmyndari, en hefur einstaka hæfileika til að sjá hestinn í allri sinni fegurð. Hún er uppalin í sveit og hefur frá blautu barnsbeini rýnt í atferli í hrossastóði, á því mjög auðvelt með að ná trausti hestanna og nálgast þá.

„Svo finnst mér gott að vera hjá þeim í svolítið langan tíma, þá gleyma þau mér bara og fara að gera sitt.“

Hún segir að hestana eiga margvísleg samskipti sín á milli og leiki sér mikið.

„Mér finnst eiginlega best að vera bara í felum. Þau koma til mín, þefa af mér heilsa upp á mig og sjá að ég er ekkert að fara að smala þeim og það er allt í lagi með mig.“

Í þættinum fer hún yfir það hvernig hún nær góðum myndum af þessum fallegu og kraftmiklu skepnum. Hún ræðir einnig hvernig myndir frá henni enduðu á fimm stjörnu hóteli í fjarlægu landi. Þáttinn má finna í heild sinni í spilaranum hér fyrir neðan.

Klippa: Hestalífið - Gígja og Sigurgeir ljósmyndarar

Ævintýratengdur áhugi

En það er fleira en ljósmyndaáhuginn sem í gegnum árin hefur fengið Gígju til að eyða löngum stundum í hrossastóði.

„Þetta er eins og að hlaða batteríin eða hugleiðsla eða eitthvað. Bara vera með þeim hérna. Bara yndislegt.“

Mynd/Gígja Einarsdóttir

Við ræktun margra erlendra hestakynja eru einungis örfáir skilgreindir litir leyfðir, en í íslenska hrossastofninum er þvert á móti reynt að halda í fjölbreytileika lita í ræktunarstarfinu. Þetta hefur endurspeglast í ljósmyndum Gígju, en hún sér listina þó einnig verða til í einfaldleikanum.

„Ég hef alltaf verið ótrúlega hrifin af gráum hestum. Ég hef alltaf heillast af þeim. Ég veit ekki alveg af hverju, en kannski er það eitthvað ævintýratengt eða eitthvað svoleiðis.“

Mynd/Gígja Einarsdóttir

Myndir Gígju eru meðal annars á ION hótelinu á Nesjavöllum en einnig á hóteli á fjarlægari slóðum.

„Það voru tveir menn sem höfðu samband við mig frá Kasakstan og þeir vildu kaupa myndir af mér á hótel. Þeir vildu hafa ljósa hesta, hvítan bakgrunn og eitthvað sem minnti á mongólska hestinn líka. Nú er bara íslenski hesturinn á hóteli í Kasakstan á fimm stjörnu geðveiku hóteli þannig að ég held bara áfram að taka myndir af þeim.“

Gígja Einarsdóttir fangar einstök augnablik af hestum.

Mannlífsþátturinn Hestalífið birtist á Vísi og Stöð 2 Maraþon aðra hverja viku en með umsjón þáttar fer Telma Lucinda Tómasson. Þættirnir eru unnir fyrir Vísi í samstarfi við framleiðslufyrirtækið Beit.


Tengdar fréttir

Hestamennskan grefur sig djúpt inn í sálarlíf fólks

Í dag fer í loftið hér á Vísi fyrsti þátturinn af Hestalífinu í umsjón Telmu Lucindu Tómasson. Í þessum mannlífsþáttum fá áhorfendur að heimsækja skemmtilegt hestafólk sem hefur frá mörgu að segja.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.