Dusty Stórmeistarar

Úrslitaleikur Stórmeistaramóts Vodafonedeildarinnar í CS:GO fór fram í kvöld. Fersk uppstilling hjá reynsluboltunum í Hafinu spilaði gegn liði deildarmeistaranna, Dusty. Eftir tvo hörkuspennandi leiki í kortunum Vertigo og Dust2 stóðu Dusty uppi sem Stórmeistarar.

Vertigo, fyrsta kort, val Dusty

Í kortavali Dusty, Vertigo, lak Hafið af stað. Í upphafslotum sem oftar en ekki einkennast af hraða var sóknarleikur(terrorist) Hafsins skipulagður og vandvirkur. Sigldi Hafið upphafslotunum heim en Dusty lét þá borga fyrir þær.

Var það mikilvæg opnunarfellu hjá StebbiC0C0 (Stefán Ingi Guðjónsson) og glæsileg móttakan hjá EddezeNNN (Eðvarð Þór Heimisson) sem kom Dusty á blað. Eftir blóðugar upphafslotur var þetta allt sem þurfti til að fella efnahaginn hjá Hafinu. Með fjárhagslegt forskot og fullan útbúnað jafnaði Dusty leikinn og tók að lokum forustuna.

Leikstjórnandi Hafsins Auddzh (Auðunn Rúnar Gissurarson) rak þó sína menn áfram með harðri hendi og leiddi með fordæmi. Með vandaðri spilamennsku tókst þeim að koma til baka og fóru þrjár mikilvægar lotur beint í sjóinn.

Staðan í hálfleik Dusty 8 – 7 Hafið

Dusty tók upphafslotuna með fullkomlega tímasettri klemmusókn. Önnur lota var blóðug en þar stóð Hafliðinn b0ndi (Páll Sindri Einarsson) uppi eftir að hafa verið einn eftir á móti fjórum leikmönnum Dusty. Lotan féll þó Dusty í vil þar sem ekki fannst tími til að aftengja sprengjuna.

Það var ekki fyrr en Dusty lenti á kletti að nafni dell1 (Sverrir Hjaltested) sem að sóknarleikurinn brotnaði. Þær tvær lotur sem að Hafið tengdi saman má skrifa skuldlaust á hann. Þriðja lotan sem hefði komið Hafinu aftur inn í leikinn virtist vera í höfn þegar þeir voru í yfirtölu tveir gegn einum.

Blessunarlega fyrir Dusty var það Bjarni (Bjarni Þór Guðmundsson) gegn Hafinu. Með frábærum töktum yfirspilaði hann báða leikmenn Hafsins og færði Dusty gífurlega mikilvæga lotu. Sóknarleikurinn hjá Dusty næstu loturnar var það þéttur að ekki dropi komst í gegn og var sigurinn þeirra.

Lokastaðan Dusty 16 – 10 Hafið

Dust2, annað kort, val Hafsins

Dusty hóf leikinn í vörn(counter-terrorist). Með djarfri pressuvörn þar sem hárfínt mið StebbiC0C0 (Stefán Ingi Guðjónsson) skipti sköpum tók Dusty fyrstu lotuna. Hafið var þó fljótt að svara og var barist grimmilega um hverja lotu.

Í leikhluta þar sem ekkert var gefið eftir og allir leikmenn stóðu undir sínu. Þá voru það leikstjórnendurnir sem stóðu upp úr. Auddzh (Auðunn Rúnar Gissurarson) náði Dusty ítrekað þegar þeir áttu minnst von á því með vel tímasettri pressu. En Bjarni (Bjarni Þór Guðmundsson) leikstjórnandi Dusty barði tennurnar úr sóknarleik Hafsins við hvert tækifæri.

Staðan í hálfleik Dusty 8 – 7 Hafið

Seinni hálfleikur gaf þeim fyrri ekkert eftir. Hafið vann upphafsloturnar með þéttum varnarleik sem Dusty fann engar glufur á. Er leið á tókst Dusty þó fullvopnuðum að skjóta göt varnarleik Hafsins. Næstu lotur féllu Dusty í vil einkenndust af þéttu samspili og vel framkvæmdum sóknarfléttum.

Hafið var þó fljótt að finna krók á móti bragði, með allee (Alfreð Leó Svansson) í stóru hlutverki á svæði A og leiklæsi seildust þeir eftir stjórninni á leiknum. Reynslumiklir Dusty menn sáu í hvað stefndi og breyttu því takti leiksins.

Með hraðri klemmusókn á svæði B komu þeir Hafinu í opna skjöldu. Setti þessi lota varnarleik Hafsins á hælanna. Dusty gáfu Hafinu ekki tækifæri á að ná aftur taki á leiknum og stálu kortinu þeirra af þeim.

Lokastaðan Dusty 16 – 12 Hafið

Eftir stórglæsilegt tímabil standa liðsmenn Dusty með titla í báðum höndum. Óumdeilanlega besta lið á Íslandi í dag, deildar- og Stórmeistarar Vodafonedeildarinnar.