Erlent

Vara al­menning við því að skipu­leggja ferð­alög um jólin

Telma Tómasson skrifar
Yfirvöld í nokkrum Evrópuríkjum segja ekki tímabært fyrir almenning að huga að ferðalögum um jólin.
Yfirvöld í nokkrum Evrópuríkjum segja ekki tímabært fyrir almenning að huga að ferðalögum um jólin. Getty/Kiran Ridley

Yfirvöld í nokkrum Evrópuríkjum hafa varað fólk við að skipuleggja ferðalög um jólin, enda sé kórónuveirufaraldurinn enn í sókn víða í álfunni.

Í Svíþjóð greindi Anders Tegnell sóttvarnalæknir frá því að landsmenn mættu búa sig undir hugsanlegar ferðatakmarkanir í kringum jólahátíðina til að koma í veg fyrir að heilbrigðiskerfið færi á hliðina og að tillögur þess efnis gætu litið dagsins ljós á næstunni.

Tegnell sagði að flest ný smit í landinu mætti rekja til gleðskapar og veisluhalda og vonaði hann að reglur um lokun öldurhúsa eftir klukkan tíu, sem taka gildi í næstu viku, verði ekki til þess að fólk hópist saman í einkasamkvæmum.

Fjörutíu manns létust af völdum Covid-19 í Svíþjóð í gær og er það hæsta dánartala í faraldrinum í fimm mánuði.

Tónninn í stjórnvöldum á Írlandi og Frakklandi er á svipuðum nótum, eftir því sem fram kemur í frétt á breska ríkismiðlinum BBC, og sögðu ráðherrar í viðtölum við fjölmiðla að ekki væri tímabært að huga að ferðalögum á þessum eina annasamasta tíma hvers árs.

Víða í Evrópu eru í gildi strangar sóttvarnaaðgerðir, samkomutakmarkanir og jafnvel útgöngubann, nú aðeins sex vikum fyrir jól.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.