Vill reka bófana úr bænum

„Ég er ekkert að bulla þetta. Ef ég ætti nýjustu tæki, GPS-tæki, hefði ég átt pening hefði ég látið nýlegt slíkt tæki í sætið og rakið gps. staðsetninguna. Vantar svona hugmyndaflug í lögguna,“ segir Siglfirðingurinn Guðni Sveinsson í samtali við Vísi. Guðni var á árum áður lögregluþjónn á Siglufirði og veit því um hvað hann er að tala.

Hypjið ykkur úr bænum

Guðni segir að gripdeildir undanfarna daga hafi vakið upp verulegan ótta í hinu litla samfélagi sem Siglufjörður er. 

Sjálfur skrifaði hann athyglisverðan pistil sem hann birti á Facebook-samfélaginu Siglfirðingar, fyrr og nú – Sögur og myndir. Hann segist gera það til að hrella innbrotsþjófa sem hafa farið um bæjarfélagið og hrellt bæjarbúa. 

Einn hafði verið handtekinn grunaður um innbrot en Guðna grunaði að fleiri væru að verki.

Pistil sinn kallar hann Siglufjarðarbófinn nr. 2.

Bófarnir nota tækifærið þegar minni löggæsla er

Guðni segist hafa það á tilfinningunni að þeir þrjótar sem nú herji á samfélagið lesi skrif sín á þeim vettvangi.

„Ég held að þeir séu fleiri en einn. Ég náði ekki í neinn, ég er bara að stríða þeim. Ég hef engan áhuga á að láta rústa bílnum mínum, fór að skrifa á netið, veit að þetta pirrar þá. 

Ég er sit hér við tölvuna, gamalmenni sem leiðist það að þessir menn gangi hér um bæinn. Ég ber sterkar tilfinningar til Siglufjarðar. Nú telst heppni ef sést lögreglubíl,“ segir Guðni sem telur einsýnt að bófarnir, sem hann kallar svo, sæti færist þegar minni löggæsla er í hinum minni bæjarfélögum. 

Vísir hefur greint frá innbrotum sem átt hafa sér stað að undanförnu í bænum.

„Ég er bara að reyna að verja mitt og mína. En þessir menn fara bara inn á fólk um miðja nótt. Fólk er farið að læsa húsum sínum sem aldrei hefur verið. Ég hef áhyggjur af þessu. Margir sem eru hræddir,“ segir Guðni. Hann vill ekki gera sig að neinu aðalatriði málsins. Nær væri að heyra í bæjarstjóranum.

Margir skelkaðir þó bærinn sé ekki á valdi óttans

Vísir tók hann á orðinu með það og setti sig í samband við Elías Pétursson, bæjarstjóra. Hann segir ljóst að einhverjir hafi staðið fyrir gripdeildum á Siglufirði undanfarna daga.

„Sem byrjaði með að einhver gægðist inn um glugga, einhver að reyna að komast inn í hús án þess að brjótast inn. Svo tók málið nýja stefnu. Það var sannanlega brotist inn í grunnskólann og það var aðili handtekinn af lögreglu. þetta er meira en maður var að vona að yrði. þegar svona gerist grípur um sig einhver, ég vil kannski ekki segja ótti, en þetta er ekki það sem fólk vill hafa í bæjarfélaginu sínu. Fólk er vart um sig,“ segir Elías.

Hann segir ljóst að eftir að samgöngur breyttust til hins betra hafi hið opinbera, með réttu eða röngu, gripið tækifærið. Lögreglan hafi fjarlægst Siglufjörð en þar á árum áður var meiri nærvera laganna varða. Nú er lögregluliðið með stórt svæði sem það þarf að sinna; Dalvík, Ólafsfirði og Siglufirði og sé lögreglan stödd á Dalvík þá séu einir 34 kílómetrar þar á milli.

„Minna viðbragð en verið hefur. Augljóslega. Við erum með lögreglustöð á Siglufirði en hún er bara mönnuð að hluta. Og ekki að nóttu til.“

Fólk farið að læsa húsum sínum

Elías vill ekki ganga svo langt að segja Siglfirðinga á valdi óttans. „Ég upplifi það ekki þannig en auðvitað stressast fólk upp. Og er áfram um að þetta klárist sem fyrst.“

Elías segist vitaskuld ekki geta þvertekið fyrir að einhverjir séu skelkaðir en andinn í bænum er ekki þannig að þar ríki skelfingarástand. En það er vissulega slæmt ef fólk telur orðið nauðsynlegt að læsa húsum sínum. Þannig hafi það ekki verið.

„Ég kem úr enn minna þorpi, þar sem maður læsti í raun aldrei. 

Öryggistilfinning er hluti af þessu landsbyggðarlífi, rólegheit og öryggi og þarna er verið að höggva í það. 

Augljóst.“ Bæjarstjórinn segir jafnframt að í litlu samfélagi sé betur tekið eftir því þegar innbrot eru en í Reykjavík.

„Þar væri líklega ekki verið að fjalla um þetta á þennan hátt. sem ég tel plús fyrir landsbyggðina. Hlunnindi í fámenninu.“