Golf

John Daly fór holu í höggi berfættur: „Sem betur fer náði ég þessu á mynd“

Óskar Ófeigur Jónsson skrifar
John Daly hefur alltaf verið litríkur og skemmtilegur kylfingur.
John Daly hefur alltaf verið litríkur og skemmtilegur kylfingur. Getty/Steve Dykes

Bandaríski kylfingurinn John Daly fór holu í höggi berfættur og það náðist á myndband sem fór á flug á netmiðlum.

Kylfingurinn litríki og vinsæli John Daly er að ganga í gegnum erfið veikindi en þau koma þó ekki í veg fyrir að hann sýni snilli sína á golfvellinum.

John Daly fór holu í höggi á góðgerðamóti um helgina en mótið var fjáröflun fyrir aðstandendur fallna hermenn í sérsveit bandaríska sjóhersins.

John Daly var staddur á elleftu holu og kominn bæði úr skóm og sokkum þegar hann náði þessu frábæra höggi hér fyrir neðan.

„Ég varð vitni að því þegar John Daly fór holu í höggi á golfvellinum mínum á góðgerðamóti fyrir fallna hermenn. Sem betur fer náði ég þessu á mynd,“ skrifaði Josh Price sem setti myndbandið inn á Instagram síðu sína.

Eins og sjá má hér á myndbandinu fyrir ofan þá áttar John Daly sig ekki á því strax að kúlan hafi farið beint í holuna en fólkið í kringum hann er vel með á nótunum og fagnar mkið.

John Daly er að berjast við krabbamein og hefur ekki farið vel með sig í gegnum tíðina. Hann hefur samt alltaf getað spilað golf og það með tilþrifum. Það hefur hjálpað til við að gera hann að mjög vinsælum kylfingi enda er von á öllu þegar John Daly er með golfkylfuna í hendinni.

Josh Price setti myndbandið inn á Instagram síðu sína og sagðist síðan ekki trúa því hversu mikla athygli það hefur hlotið en mjög margir miðlar hafa haft samband og beðið um að fá myndbandið frá honum. Hér fyrir neðan eru þeir John Daly saman á mótinu um helgina.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.