Tónlist

Bein út­sending: Mike The Jacket í Yoda hellinum í Hjör­leifs­höfða

Tinni Sveinsson skrifar
Yoda hellirinn er í Hjörleifsshöfða á Suðurlandi.
Yoda hellirinn er í Hjörleifsshöfða á Suðurlandi.

Tónlistarmaðurinn Mike the Jacket spilar tónlist í svokölluðum Yoda helli í Hjörleifshöfða í útsendingu sem hefst hér á Vísi klukkan 20 í kvöld.

Yoda hellirinn er nefndur svo vegna þess að þegar staðið er inni í honum líkist hellismynnið útlínum Yoda úr Star Wars. Hann hefur á síðustu árum vaxið mjög að vinsældum meðal ferðamanna á Íslandi.

Útsendingin er á vegum íslenska viðburðafyrirtækisins Volume sem sérhæfir sig í útsendingum þar sem plötusnúðar þeyta skífum á framandi stöðum. 

Um Friðrik Thorlacius

Mike the Jacket er hliðarsjálf tónlistarmannsins Friðriks Thorlacius og eru ferli hans gerð góð skil í fréttatilkynningu frá Volume:

„Listamaðurinn, próduserinn og hinn almenni gleðigjafi, Friðrik Thorlacius betur þekktur sem Mike The Jacket, fer í ferðalag sem þú vilt ekki missa af enda plötusnúður sem að hefur komið víða í tónlistarsenunni hér heima og erlendis.

„Áður en Mike The Jacket verkefnið fór af stað fyrir alvöru þá komst Friðrik meðal annars í topp 10 í keppni tónlistarmannsins og Íslandsvinarins DeadMau5 árið 2011. Þá var Friðrik hluti af þríeykinu Plugg’d sem gerði magnaða hluti fyrir senuna 2006-2012 ásamt Techno.is. Þau hituðu upp fyrir rjómann af stærstu og flottustu plötusnúðum heims sem sóttu landið á þeim tíma og voru skemmtistaðirnir Nasa og Broadway vinsælustu staðirnir þá. Strákarnir áttu miklar vinsældir með remixum eins og Kocaloka eftir partýdrengina í hljómsveitinni Dr. Mister & Mister Handsome.

Þar á eftir tók við nýtt ævintýri undir nafninu KSF (Killer Sounding Frequencies). Þá fór Friðrik sínar eigin leiðir í tónlistinni og sannaði sig sem ferskur upprennandi danstónlistarmaður sem vildi helst allar reglur brjóta en gera það með stæl og prófa allt ... og það virkaði. KSF vann meðal annars risastóra remix-keppni á vegum Groove Cruise árið 2016. Groove Cruise er hátíð á 14. hæða skemmtiferðaskipi sem siglir milli Miami og Jamaica. KSF hefur líka spilað á öllum hátíðum Secret Solstice í Laugardalnum og skipuðu sig sem eitt stærsta íslenska tónlistar duo-ið á hátíðinni síðustu ár. Friðrik hefur einnig unnið að fjölmörgum auglýsingaverkefnum í gegnum árin. Hann gerir allt sitt myndefni og tónlistarmyndbönd sjálfur. 

24. september verður frumsýningarpartý á Dillon fyrir nýtt myndband hliðarverkefnisins K.A.T (Kaoz & Thrills). Þar er Friðrik í samstarfi við Ívar úr Dr.Mister & Mister Handsome og Jórunni Steinson. Myndbandið var tekið upp á Spáni fyrr á árinu í miklum erfiðleikum þar sem að Covid-19 var að herja á heimsbyggðina en útkoman er vægast sagt stórkostleg og tekin upp á Samsung (S8) og Gopro.“


Tengdar fréttir






Fleiri fréttir

Sjá meira


×