Golf

Fagnaði óvæntum sigri sínum á ANA með því að stökkva út í tjörnina

Óskar Ófeigur Jónsson skrifar
Mirim Lee fagnar sigri sínum með kylfusveinunum Matt Gelczis en þau hoppuðu bæði út í tjörnina.
Mirim Lee fagnar sigri sínum með kylfusveinunum Matt Gelczis en þau hoppuðu bæði út í tjörnina. Getty/Christian Petersen

Mirim Lee vann sitt fyrsta risamót um helgina þegar hún tryggði sér sigur á ANA Inspiration risamótinu en úrslitin réðust í þriggja manna umspili.

Hin 29 ára gamla Mirim Lee er frá Suður-Kóreu. Sigur hennar er mjög óvæntur enda ekki í hópi bestu kylfinga heims. Mirim Lee náði sem dæmi ekki niðurskurðinum á þessu sama móti í fyrra en besti árangur hennar á risamóti fyrir helgina var annað sætið á Opna breska meistaramótinu árið 2016.

Mirim Lee var bara í 94. sæti á heimslistanum fyrir mótið en mun eflaust hækka sig talsvert á listanum núna. Hún fékk líka 465 þúsund Bandaríkjadali fyrir sigurinn eða tæpar 63 milljónir króna.

Nelly Korda og Brooke Henderson voru efstar fyrir lokadaginn og flestir bjuggust við því að þetta yrði einvígi á milli þeirra í lokin. Mirim Lee var tveimur höggum á eftir þeim fyrir síðasta daginn en tókst að tryggja sér umspil með því að spila á 67 höggum eða fimm höggum undir pari.

Mirim Lee tryggði sér síðan sigurinn með því að fá fugl á fyrstu umspilsholunni en það var spilað eftir bráðabanareglum. Mirim Lee lék átjándu holuna á fjórum höggum en hinar tvær spiluðu hana á fimm höggum.

„Ég talaði við vini mína heim fyrir umspilið. Þau sögðu mér að láta vaða og koma heim sem fyrst,“ sagði Mirim Lee með hjálp túlks.

„Það er svolítið klikkað að ég hafi unnið,“ sagði Mirim Lee. Hún fagnaði sigrinum með því að hoppa út í tjörnina við átjándu holuna. Tilþrifin voru þó mun meiri hjá kylfusveinunum hennar eins og sjá má hér fyrir neðan.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.