Þrjá­tíu kanadískir her­menn settu upp rat­sjár­búnað á Kefla­víkur­flug­velli

Færanlegum ratsjárbúnaði hefur verið komið upp á Miðnesheiði. Kanadíski flugherinn kom með búnaðinn til landsins og hafa undanfarnar vikur unnið að uppsetningu með starfsmönnum Landhelgisgæslunnar á öryggissvæðinu á Keflavíkurflugvelli.

Alls komu 30 liðsmenn kanadísku sveitarinnar að uppsetningu samkvæmt því sem segir í tilkynningu frá Landhelgisgæslunni. Markmiðið er að tryggja að eftirlit með loftrýminu sé órofið. Um er að ræða uppfærslu á ratstjáreftirlitskerfinu og er verkefnið að mestu fjármagnað af Mannvirkjasjóði Atlantshafsbandalagsins.

„Framlag Kanada er þýðingarmikið og endurspeglar mikilvægt samstarf þjóðanna, samstöðu aðildarríkja Atlantshafsbandalagsins og mikilvægi þess fyrir bandalagið. Afar brýnt er að á Íslandi sé virkt loftrýmiseftirlit alla daga ársins. Ratsjárstöð kanadíska flughersins tryggir að svo verði áfram meðan unnið er að uppfærslunni. Landhelgisgæslan er þakklát kanadísku flugsveitinni og framlagi hennar til verkefnisins.“