Stjarnan sendir inn kæru til KKÍ á hendur Seth LeDay | Mynd­band

Körfuknattleiksdeild Stjörnunnar hefur sent inn kæru til KKÍ á hendur Seth LeDay, leikmanns Grindavíkur, eftir atvik í leik Stjörnunnar og Grindavíkur á mánudaginn.

Seth LeDay og Kyle Johnson, leikmaður Stjörnunnar, lentu saman og í kjölfarið sló Seth í höfuðið á Kyle eins og má sjá í myndbandinu hér efst í fréttinni.

Dómarar leiksins ákváðu að aðhafast ekkert í málinu en Stjarnan hefur nú sent inn kæru. Daníel Guðni Guðmundsson, þjálfari Grindavíkur, staðfesti þetta við blaðamann Vísis í kvöld.

Kæran verður tekin fyrir á næsta agafundi KKÍ en þetta gæti leitt til þess að Seth muni verða í leikbanni er Fjölnir mætir Grindavík í undanúrslitum Geysisbikarsins um næstu helgi.

Í hinu undanúrslitaeinvíginu mætast einmitt Stjarnan og svo Tindastóll.

Seth hefur komið öflugur inn í lið Grindavíkur frá því að hann gekk í raðir liðsins í síðasta mánuði og fékk mikið hrós í Domino’s Körfuboltakvöldi á dögunum.