Leitin að loðnutorfunum teiknast upp á rauntíma

Fyrsta loðnan er fundin út af Austfjörðum í þeim umfangsmikla leitarleiðangri sem nú er hafinn. Það er þó aðeins lítilræði sem hefur enn fundist og reyna leitarskipin nú að kortleggja hvort þarna séu stærri loðnugöngur á ferðinni. Fjallað var um leitina í fréttum Stöðvar 2. 

Þegar hafrannsóknaskipið Árni Friðriksson lagði af stað úr Reykjavík á mánudag var búist við að tvö veiðiskip kæmu með. Þeim hefur nú verið fjölgað og eru alls fimm skip í leiðangrinum. 

Fylgjast má með leitinni á rauntíma á heimasíðu Hafrannsóknastofnunar. 

Með því að haka í viðkomandi reit má sjá leitarferil hvers skips sem og fleiri skipa saman.

Uppsjávarveiðiskipið Ásgrímur Halldórsson SF sigldi frá Hornafirði og leitar upp með Austfjörðum. Bjarni Ólafsson AK sigldi frá Seyðisfirði og hóf leitina djúpt suðaustur af Hvalbak og hefur síðan verið að feta sig norður. Grænlenska skipið Polar Amaroq, sem lagði upp frá Norðfirði, leitar svæðið á milli þeirra. 

Árni Friðriksson og Hákon EA leita norðausturhornið djúpt út af Langanesi. Árni fer svo suður á móti hinum skipunum meðan Hákon heldur vestur með Norðurlandi í átt til Vestfjarða. 

Að sögn leiðangursstjórans Birkis Bárðarsonar hafa skipin þegar séð vott af loðnu, bæði út af Langanesi, og eins út af miðjum Austfjörðum, en þó enga afgerandi loðnugöngu, en venjulega gengur loðnan á þessum árstíma niður með Austfjörðum til hrygningarstöðva úti fyrir suðurströndinni. 

Verstöðvarnar sem vinna loðnuna raða sér á þessa gönguleið; Þórshöfn, Vopnafjörður, Seyðisfjörður, Neskaupstaður, Eskifjörður, Fáskrúðsfjörður, Hornafjörður, Vestmannaeyjar. Á þessum stöðum eru gríðarlegir hagsmunir undir. Ef alvöru loðnutorfur finnast fljótlega gæti það þýtt fimmtán til tuttugu milljarða króna tekjur í þjóðarbúið en það er bara á næstu tveimur mánuðum sem glugginn er opinn. 

Hér má sjá frétt Stöðvar 2: