Væta, hláka og leysingar í dag

Líkur eru taldar á töluverðum vatnavöxtum á sunnan- og vestanverðu landinu í dag og á morgun eftir sunnan hvassviðri eða storm sem gekk yfir landið í nótt. Gular- og appelsínugular viðvaranir vegna veðurs verða áfram í gildi fram á kvöldið.

Sérstaklega er búist við auknu afrennsli á norðanverðu Snæfellsnesi, svæðinu í kringum Mýrdalsjökul og á Suðausturlandi. Þá eru taldar líkur á vatnavöxtum í Skagafirði og Eyjafjarðará vegna snjóbráðar í kjölfar hækkandi hita og hvassra vinda. Óvissustig vegna snjóflóðahættu er í gildi á norðanverðum Vestfjörðum.

Varað er við því að flughálka geti myndast þegar blotnar á svelli eða þjöppuðum snjó. Þegar við bætist hvass vindur verði aðstæður til aksturs varasamar. Ganga þurfi úr skugga um að fráveitukerfi virki til að forðast vatnstjón í vætu og hláku dagsins.

Nú í morgun voru appelsínugular viðvaranir í gildi vegna storms fyrir Vestfirði, Strandir og Norðurland vestra, Norðurland eystra og Miðhálendið. Við tekur gul viðvörun fram eftir degi á Vestfjörðum og Norðurlandi. Þá tók gul viðvörun gildi vegna suðvestan hvassviðris eða storms á Austurlandi að Glettingi klukkan fimm í morgun og gildir fram á kvöld. Á Suðausturlandi er varað við mikilli rigningu til klukkan níu í morgun.

Búist er við sunnan og suðvestan 18-25 m/s með vætu í dag en rofa á til austanlands eftir hádegið. Hiti verður á bilinu fimm til tólf stig, hlýjast á Austurlandi. Í kvöld er gert ráð fyrir suðvestan 13-20 m/s með slydduéljum á vesturhelmingi landsins og kólnandi veðri.

Á morgun er spáð suðvestan 15-23 m/s og víða éljum. Bjart á að vera á austanverðu landinu og hiti nálægt frostmarki.