Golf

Sá yngsti á Íslandsmótinu í golfi er þrettán ára og datt inn daginn áður en mótið hófst

Óskar Ófeigur Jónsson skrifar
Markús Marelsson á Íslandsmótinu á Hlíðavelli í Mosfellsbænum.
Markús Marelsson á Íslandsmótinu á Hlíðavelli í Mosfellsbænum. Mynd/GSÍ/seth@golf.is

Markús Marelsson er yngsti kylfingurinn á Íslandsmótinu í golfi og hann er líklegur til að ná niðurskurðinum eftir flotta spilamennsku á öðrum deginum í dag.

Markús Marelsson kláraði annan hringinn á 74 höggum eða tveimur höggum yfir pari. Hann er þar með á tíu höggum yfir pari samtals.

Niðurskurðarlínan er núna við nítján högg yfir pari og það þarf því mikið að gerast til þess að Markús Marelsson fái ekki að keppa um helgina.

Markús Marelsson var í viðtali við heimasíðu Golfsambands Íslands þar sem kom meðal annars fram að hann var á biðlista fyrir Íslandsmótið í golfi í ár. Markús beið því spenntur eftir því að fá tækifæri til að keppa ef einhver forföll yrðu í keppendahópnum. Markús, sem er fæddur árið 2007, fékk símtalið sem hann hafði beðið eftir daginn fyrir fyrsta keppnisdaginn.

„Ég var alltaf að skoða keppendalistann og sjá hvort einhverjar breytingar væru á honum. Síðan fékk mamma símtal frá mótsstjórninni og ég hoppaði og fagnaði þegar hún sagði mér fréttirnar. Ég var mjög glaður að fá tækifærið að keppa á þessu móti,“ segir Markús í viðtali á heimasíðu GSÍ.

Markús keppir fyrir Keili í Hafnarfirði en hann er búsettur á Álftanesi. Markús hóf golfferilinn hjá GKG en hann valdi að fara í Hafnarfjörðinn þar sem að Hvaleyrarvöllurinn heillaði hann mikið.

Markús lék frábært golf á öðrum keppnisdeginum í morgun og bætti hann sig um 6 högg frá fyrsta hringnum. Markús lék á 10 höggum yfir pari vallar samtals og í dag lék hann á +2 þrátt fyrir að hafa fengið þrefaldan skolla á 11.

Markús ætlar sér eins langt og hægt er í golfíþróttinni og hann nýtir hverja stund til að æfa sig.

„Ég er með gott æfingasvæði á Álftanesi en ég fer mjög oft út á tún sem er við golfvöllinn til að slá á grasi. Þar slæ ég kannski 100-200 bolta. Annars er ég mest úti í Keili að æfa mig,“ sagði Markús Marelsson við golf.is en það má lesa allt viðtalið hér.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.