Viðskipti innlent

Góð staða Play kom Ragnari Þór á óvart

Stefán Ó. Jónsson skrifar
Ragnar Þór Ingólfsson, formaður VR, átti fund með forsvarsmönnum Play.
Ragnar Þór Ingólfsson, formaður VR, átti fund með forsvarsmönnum Play. vísir/vilhelm

Um leið og Ragnar Þór Ingólfsson, formaður VR, biður aðstandendur flugfélagsins Play afsökunar á yfirlýsingum sínum segir hann það hafa komið sér á óvart hversu langt undirbúningur þess er kominn. Ragnar Þór fundaði með forsvarsmönnum Play á dögunum, að frumkvæði þeirra, eftir að Ragnar hafði ýjað að því að flugfélagið væri í „skattaskjólsbraski.“

Það gerði Ragnar Þór í færslu á mánudag sem hann ritaði vegna umræðunnar um að flugfélögin Bláfugl og Play gætu fyllt skarð Icelandair, færi það í þrot. Fátt hefur verið fyrirferðameira í fréttum síðustu daga en tilraunir stjórnenda Icelandair til að bjarga félaginu út úr kórónuveiruhremmingunum og kjarasamningaumleitanir við flugstéttir Icelandair, ekki síst flugfreyjur.

„Fá hér flugfélög í skattaskjólsbraski sem veigra sér ekki við að úthýsa störfum til Indlands eða Filippseyja eða hverra landa sem réttindi og laun eru lægst fyrir mestu vinnuna? Setja svo restina á gerviverktöku í gegnum starfsmannaleigur? Þó ekki sé út frá flugöryggissjónarmiðum hlýtur metnaður okkar að vera meiri en þetta,“ skrifaði Ragnar Þór um Bluebird og Play, við litla hrifningu stjórnenda þess síðarnefnda.

Þeir buðu Ragnari til fundar við sig til að svara þessum ásökunum hans og segir formaður VR í færslu í dag að hann hafi þegið boðið - „enda ekki annað í boði en að standa fyrir máli sínu sé þess óskað.“

Kjörin komu á óvart

Fundur þeirra hafi staðið í tvo tíma og verið hinn áhugaverðasti, ekki síst í ljósi þess hversu vel undirbúningur Play gengur að sögn Ragnars.

„Ekki grunaði mig hversu umfangsmikil starfsemin er orðin, metnaðurinn, og kjörin sem félagsmenn okkar eru á. Það kom mér á óvart hversu langt þetta er komið en um 40 manns starfa hjá félaginu, margir með mikla reynslu af flugrekstri,“ skrifar Ragnar Þór.

Skúli Skúlason, stjórnarformaður og aðaleigandi Play, minntist á þetta í samtali við fjölmiðla í síðustu viku. Flugfélagið sé á leið í loftið, Búið sé að safna nægilegum fjölda fjárfesta til að „keyra flugfélagið áfram“, þó að ekki sé útilokað að fleiri fjárfestar bætist í hópinn. Ytri aðstæður ákvarði hvenær fyrsta vélin tekur á loft.

„Eftir að hafa fundað með þessu kraftmikla og metnaðarfulla fólki varð mér ljóst að það voru mistök að tengja þessi tvö félög, Bláfugl (e. Bluebird Nordic) og Play, með þeim hætti sem ég gerði og harma ég það mjög. Play verður vitanlega að njóta vafans. Eða þangað til annað kemur í ljós,“ skrifar Ragnar Þór í fyrrnefndri færslu sem má sjá hér að neðan.

Nýtt flugstéttarfélag tilbúið í viðræður

Verkalýðsforinginn segist að sama skapi hafa spurt hvort VR geti sannreynt kjör og kjarasamninga hjá félaginu - „í ljósi ýmissa fullyrðinga sem við höfðum innan úr verkalýðshreyfingunni.“ Það hafi verið auðsótt mál og segir Ragnar að „ekkert sem bendir til þess“ að hægt sé að bendla Play við það sem hann ýjaði að í færslu sinni á mánudag.

Í samtali við Mannlíf í dag segir Vignir Örn Guðnason, formaður Íslenska flugstéttarfélagsins, að kjarasamningar félagsins við Play séu „góðir og gildir“ og þau séu „mjög sátt með“ með innihald þeirra. Stéttarfélagið varði áður hagsmuni flugmanna WOW air en er nú orðið löggilt stéttarfélag flugmanna og flugliða. Því sé ljóst að „til staðar er hér á landi annað stéttarfélag flugfreyja en Flugfreyjufélag Íslands kjósi Icelandair að leita annað“ eins og það er orðað í umfjöllun Mannlífs.

Icelandair sagði í skilaboðum til FFÍ í vikunni að flugfélagið hafi þó ekki leitað á náðir annarra stéttarfélaga í yfirstandandi kjaradeilu. Vignir Örn staðfestir það en segir Íslenska flugstéttarfélagið tilbúið til viðræðna sé þess óskað.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ARION
4,05
32
695.314
ORIGO
2,91
13
49.262
REITIR
2,57
13
82.858
TM
2,4
8
288.286
EIK
2,08
3
21.933

Mesta lækkun dagsins


Félag
Br.%
Fjöldi
Velta*
ICEAIR
-4,35
60
17.689
EIM
0
3
8.688
Velkomin á Vísi. Þessi vefur notar vafrakökur. Sjá nánar.