Viðskipti innlent

Stýrivextir lækkaðir um 0,75 prósentur

Stefán Ó. Jónsson skrifar
Frá fundi peningastefnunefndar í morgun.
Frá fundi peningastefnunefndar í morgun. vísir/vilhelm

Peningastefnunefnd Seðlabanka Íslands hefur ákveðið að lækka vexti bankans um 0,75 prósentur. Meginvextir bankans, vextir á sjö daga bundnum innlánum, verða því 1 prósent og hafa aldrei verið lægri.

Samhliða þessu ákvað nefndin að hætta að bjóða upp 30 daga bundin innlán. Í rökstuðningi sínum segir peningastefnunefnd að ákvörðunin um að hætta að bjóða upp á umrædd innlán feli í sér að meginvextir bankans verði virkari og vaxtaskilaboð bankans skýrari. „Aðgerðin ætti að öðru óbreyttu að auka laust fé í umferð og styrkja miðlun peningastefnunnar enn frekar,“ eins og segir í yfirlýsingu nefndarinnar.

Greinendur höfðu verið á einu máli um að peningastefnunefnd myndi tilkynna um stýrivaxtalækkun í dag og að lækkunin yrði á bilinu 0,5 til 1 prósentustig. Þetta er fjórða stýrivaxtalækkunin í ár en áður höfðu þeir verið lækkaðir um 1,25 prósentustig, þar af tvisvar um hálft prósentustig með viku millibili í mars. 

Rökstuðning peningastefnunefndar fyrir ákvörðun sinni má lesa hér að neðan

Peningastefnunefnd gerir grein fyrir ákvörðun sinni á kynningarfundi klukkan 10. Þar mun Ásgeir Jónsson seðlabankastjóra auk annarra nefndarmanna sitja fyrir svörum.Vísir/sigurjón

Rökstuðningur

Samkvæmt nýrri þjóðhagsspá Seðlabankans sem birt er í maíhefti Peningamála eru horfur á 8% samdrætti landsframleiðslu í ár. Þar vegur þyngst yfir 80% fækkun í komum ferðamanna til landsins. Útlit er fyrir að atvinnuleysi aukist mikið og fari í um 12% á þriðja fjórðungi ársins en verði tæplega 9% á árinu öllu. Samkvæmt spá bankans taka efnahagsumsvif smám saman að færast í eðlilegt horf á seinni hluta þessa árs og spáð er tæplega 5% hagvexti á næsta ári. Óvissan er hins vegar óvenju mikil og þróun efnahagsmála mun ráðast af framvindu farsóttarinnar og því hvernig tekst til við að vinda ofan af sóttvarnaraðgerðum.

Verðbólga mældist 2,2% í apríl og hefur verið undir verðbólgumarkmiði Seðlabankans frá því í desember sl. Gengi krónunnar hefur lækkað frá því að farsóttin barst til landsins en á móti vega mikil lækkun olíuverðs og lækkun matvæla- og hrávöruverðs. Þá hafa verðbólguvæntingar lítið breyst og kjölfesta þeirra í verðbólgumarkmiði bankans virðist traust. Samkvæmt spá Seðlabankans eykst verðbólga lítillega á næstu mánuðum vegna áhrifa gengislækkunar krónunnar. Aukinn slaki í þjóðarbúinu mun hins vegar vega þyngra þegar líða tekur á þetta ár og horfur eru á að verðbólga verði undir 2% á seinni hluta spátímans.

Traustari kjölfesta verðbólguvæntinga hefur gert peningastefnunefnd kleift að bregðast við versnandi efnahagshorfum með afgerandi hætti. Lægri vextir og aðrar aðgerðir bankans munu styðja við efnahagsbata og stuðla að því að hann verði hraðari en ella. Þá hafa aðgerðir í ríkisfjármálum lagst á sömu sveif.

Peningastefnunefnd mun áfram fylgjast grannt með framvindu efnahagsmála og nota þau tæki sem nefndin hefur yfir að ráða til að styðja við þjóðarbúskapinn og tryggja að lausara taumhald peningastefnunnar miðlist með eðlilegum hætti til heimila og fyrirtækja.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.