Einkunnir strákanna okkar á móti Ungverjum í kvöld: Alexander bestur í íslenska liðinu en mikið af tvistum

Íslenska handboltalandsliðið tapaði með sex mörkum á móti Ungverjum í þriðja leik sínum á Evrópumeistaramótinu í Svíþjóð, Noregi og Austurríki. Þetta var lokaleikur liðsins í riðlinum en fyrsta tapið í mótinu þýðir að strákarnir fara stigalausir inn í milliriðilinn.

Leikur íslenska liðsins hrundi algjörlega í seinni hálfleiknum þar sem sóknarleikurinn var alveg gjaldþrota. Það á að vera nóg til að vinna leik að fá aðeins 24 mörk á sig en sex mörk í seinni hálfleiknum var of mikið fyrir íslenska vörnina að brúa.

Ungverjar unnu seinni hálfleikinn með níu mörkum og fara með tvö stig og sex mörk í plús inn í milliriðilinn.

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.

Eftir tvo frábæra leiki í röð og mikið af flottum frammistöðum var allt annað að sjá til íslensku strákanna í þessum leik. Við erum því að sjá marga tvista að þessu sinni og einn af þeim fór á Aron Pálmarsson sem gjörsamlega gufaði upp í seinni hálfleiknum.

Alexander Petersson var enn og ný besti leikmaður íslenska liðsins í kvöld að mati okkar. Hann kom að níu mörkum, vann nokkra bolta í vörninni og reyndi sem hann gat.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.



Einkunnir Íslands gegn Ungverjalandi:

- Byrjunarlið Íslands í leiknum -

Björgvin Páll Gústavsson, mark - 3

(8 varin skot- 45:48 mín.)

Verður ekki sakaður um að hafa ekki reynt. Fékk mikið af mörkum á sig úr opnum færum. Virtist missa móðinn þegar leið á leikinn. Náði ekki að fylgja eftir góðum leik gegn Rússum.

Guðjón Valur Sigurðsson, vinstra horn - 3

(4 mörk - 49:17 mín.)

Var besti leikmaður íslenska liðsins í fyrri hálfleiknum. Stóð vaktina varnarlega og var að nýta færin sín vel. Fékk úr litlu að moða í seinni hálfleik þegar leikur íslenska liðsins hrundi.

Aron Pálmarsson, vinstri skytta - 2

(4 mörk - 45:27 mín.)

Aron byrjaði leikinn ekki vel en náði takti og skilaði þokkalegum fyrri hálfleik. Hann var hins vegar alveg afleitur í þeim síðari, gerði mikið af mistökum, var taktlaus og að því virtist andlaus. Íslenska liðið mátti alls ekki við því þegar hlutirnir voru að ganga illa.

Elvar Örn Jónsson, leikstjórnandi - 2

(0 mörk - 36:58 mín.)

Elvar hefur valdið miklum vonbrigðum á mótinu nema í varnarleiknum. Hann finnur engan takt í sóknarleiknum, virðist hræddur og óöruggir. Hann er allt annað leikmaður en við þekkjum. Hann þarf að fara í naflaskoðun.

Alexander Petersson, hægri skytta - 4

(3 mörk - 58:15 mín.)

Langbesti leikmaður íslenska liðsins í leiknum og á mótinu til þessa. Reyndi allt hvað hann gat, var stórkostlegur varnarlega en fékk hins vegar litla hjálp í sóknarleiknum ekki síst í síðari hálfleik þar sem leikmennirnir í kringum hann voru nánast statistar.

Arnór Þór Gunnarsson, hægra horn - 2

(1 mark - 30:56 mín.)

Fann engan takt í leiknum, komst aldrei inn í leikinn og fékk úr litlu að moða. Virtist á köflum bugaður í leiknum. Vonandi á hann meira inni heldur en hann sýndi á móti Ungverjum í Malmö Arena.

Kári Kristjánsson, lína - 2

(2 mörk - 23:38 mín.)

Kári er línumaður í sama þyngdarflokki og andstæðingarnir. Honum gekk hins vegar erfiðlega að koma sér í stöðu og menn hreinlega fundu hann ekki á línunni. Hann náði ekki að opna fyrir samherja sína eins og hann hefur gert í fyrstu tveimur leikjunum. Hann átti ekki góðan leik.

Ýmir Örn Gíslason, vörn - 4

(4 stopp - 34:00 mín.)

Hefur verið jafnbesti leikmaður íslenska liðsins í varnarleiknum þar sem hann hefur borið af ásamt Alexander. Fær hins vegar fá tækifæri í sókninni. Það var þó reynt gegn Ungverjum en því miður í of skamman tíma.



- Menn sem komu inn af bekknum í leiknum -

Janus Daði Smárason, leikstjórnandi - 2

(1 mark - 19:38 mín.)

Janus Daði skilaði skínandi verki gegn Rússum og byrjaði vel í leiknum gegn Ungverjum. Það fjaraði fljótt undan honum. Hann var í vandræðum gegn líkamlega sterku liði og af honum stafaði engin ógn.

Viktor Gísli Hallgrímsson, mark - 3

(2 varin skot- 11:16 mín.)

Viktor Gísli þurfti að koma inn af bekknum og berja í brestina. Hann reyndi hvað hann gat og enginn efast um hæfileikana. Reynslan kom hins vegar berlega í ljós því þar skortir honum leiki og mínútur.

Ólafur Guðmundsson, vinstri skytta - 3

(1 mark - 14:25 mín.)

Verður ekki sakaður um að standa sig ekki í varnarleiknum. Sóknarlega er hann mjög ólíkur sjálfur ef mið er tekið af síðustu mótum. Þetta kannski endurspeglar hans leik í sænsku úrvalsdeildinni í vetur þar sem hann hefur átt mjög misjafna leiki.

Sigvaldi Guðjónsson, hægra horn - 2

(0 mörk - 30:00 mín.)

Sigvaldi náði ekki að sýna okkur sömu snilld og í síðasta leik. Hann er hins vegar hæfileikaríkur en sviðið í Malmö Arena var einfaldlega of stórt fyrir Sigvalda að þessu sinni.

Bjarki Már Elísson, vinstra horn - 2

(0 mörk - 10:30 mín.)

Bjarki fékk ekki margar mínútur í leiknum en enginn efast um getuna og þann styrk sem hann býr yfir. Innkoma hans breytti engu í leiknum í kvöld. Mótið er rétt að byrja og við þurfum á honum að halda.

Haukur Þrastarson, leikstjórnandi - 3

(1 mark - 8:07 mín.)

Haukur er ungum að árum og átti ágæta innkomu í leiknum. Það er hins vegar ljóst að honum skortir reynslu til að takast á við verkefnið sem að honum var rétt. Hann mun læra af þessum leik og mæta betri til leiks gegn Slóveníu.

Viggó Kristjánsson, hægri skytta - spilaði of lítið

Arnar Freyr Arnarsson, lína - spilaði ekkert



Guðmundur Guðmundsson, þjálfari - 3

Fyrri hálfleikurinn var frábærlega útfærður hjá landsliðsþjálfaranum og það er í raun synd að íslenska liðið hafi ekki verið með meira en þriggja marka forystu í hálfleik. Guðmundur reyndi að finna lausnir í síðari hálfleik og verður ekki sakaður um annað. Var kannski svolítið seinn að bregðast við þegar í harðbakkann sló.

Útskýring á einkunnum:

6 - Heimsklassa frammistaða

5 - Frábær frammistaða

4 - Góð frammistaða

3 - Sæmileg frammistaða - skilaði sínu

2 - Ekki nógu góð frammistaða

1 - Slakur leikur