Bölmóður á mörkuðum eftir verðfall á olíu

Markaðir tóku dýfu víða um heim í morgun eftir að heimsmarkaðsverð á olíu hrundi um fimmtung vegna deilna olíuútflutningsríkja sem reyna nú að bregðast við kórónuveirufaraldrinum.

Vísitölur lækkuðu umtalsvert þegar markaðir í Evrópu og Asíu opnuðu í morgun og nótt. Evrópska STOXX 600-vísitalan féll um 7% og stefnir nú á mestu lækkun frá því að Bretar kusu að ganga úr Evrópusambandinu í júní árið 2016, að sögn Reuters-fréttastofunnar. Í London féll FTSE 100-vísitalan um 8% og töpuðu hlutabréf í olíufyrirtækjunum BP og Royal Dutch Shell um nærri því fimmtungi af verði sínu. 

Áður hafði verð á asískum mörkuðum hrapað. Búist er við því að sambærilegur bölmóður setji mark sitt á Wall Street þegar opnað verður fyrir viðskipti þar í dag, að sögn New York Times.

Svartsýni greip markaði eftir að olíuverð hrundi þegar markaðir opnuðu í nótt. Olíuverð lækkaði þá um meira en 20%. Hrunið má rekja til verðstríðs á milli Sádi-Arabíu og Rússlands.

Sjá einnig: Deila Rússa og Sáda leiðir til verðfalls á olíu

Það var í síðustu viku sem OPEC, samtök olíuútflutningsríkja þar sem Sádar ráða mestu, ákváðu að draga úr framleiðslu til að verja verð á olíu fyrir minnkandi eftirspurn vegna útbreiðslu kórónuveirunnar sem breiðist nú út um heiminn. Vildi OPEC að önnur olíuútflutningsríki eins og Rússland tækju þátt í þeim aðgerðum.

Rússar höfnuðu því á föstudag. Sádar brugðust við með því að lækka verð á olíu og boðuðu aukna framleiðslu sem myndi lækka verðið enn frekar. Með því eru Sádar taldir reyna að þrýsta á Rússa, sem eru verulega háðir olíuútflutningi, um að láta undan og taka þátt í aðgerðum OPEC, að sögn breska ríkisútvarpsins BBC.

Kórónuveiran hefur raskað samfélögum víða um heim. Nú um helgina settu ítölsk stjórnvöld hátt í sextán milljónir íbúa Langbarðalands og nokkurra héraða á Mið- og Norður-Ítalíu í sóttkví með því að takmarka verulega ferðir til og frá svæðunum. Víða um heim hafa takmarkanir verið settar á ferðalög, skólahald hefur verið lagt niður tímabundið og mannamót og samkomur slegnar af.

Seðlabankar víða um heim hafa brugðist við með því að lækka stýrivexti sína til að milda efnahagslega höggið. Vangaveltur eru um að evrópski seðlabankinn feti í fótspor þeirra þegar stjórn hans fundar á fimmtudag.