Tveggja metra reglan virt þegar Mario framlengdi til tveggja ára

Mario Matasovic hefur skrifað undir nýjan tveggja ára samning við Njarðvík og mun því leika með liðinu næstu tvö tímabil en félagið staðfesti þetta í gærkvöldi.

Mario hefur gert góða hluti hjá þeim grænklæddu síðustu tvö tímabil og var meðal annars í 10. sæti yfir framlagshæstu leikmenn deildarinnar er keppni var hætt vegna kórónuveirunnar.

Hann var með 14,4 stig og 9,8 fráköst að meðaltali í leik og 21,6 framlagspunkta að jafnaði.

„Við erum afar ánægð með að hafa Mario með okkur næstu tvö árin en hann hefur fyrir löngu unnið hug okkar og hjörtu í Njarðvík með framgöngu sinni inni á vellinum og ekki skemmir nú fyrir að hann er fyrirmyndar eintak í alla staði,” sagði Brenton Birmingham varaformaður körfuknattleiksdeildar Njarðvíkur í samtali við heimasíðu félagsins.