Framarar settu mikla spennu í fallslaginn - myndir

Framarar sáu til þess að fimm lið eru í fallhættu í Pepsi-deild karla þegar aðeins tvær umferðir eru eftir. Fram vann 1-0 sigur á Keflavík á Laugardalsvellinum í gærkvöldi og hefur þar með náð í 10 af 18 stigum sínum í Pepsi-deildinni í sumar í síðustu fimm leikjum sínum.

Keflavík átti möguleika að bjarga sér endanlega frá falli með sigri í þessum leik í gærkvöldi en það tókst ekki og því eru Keflvíkingar aðeins þremur stigum á undan Fram. Þrjú önnur lið eru líka í mikilli fallhættu. Blikar og Þórsarar hafa 21 stig eins og Keflavík og Grindvíkingar eru síðan stigi á eftir aðeins tveimur stigum á undan Fram.

Kristinn Ingi Halldórsson tryggði Fram þennan gríðarlega mikilvæga sigur í gær en Framliðið hefur nú unnið þrjá síðustu leiki sína á Laugardalsvellinum eftir að hafa spilað sjö fyrstu heimaleiki sína í sumar án þess að ná að fagna sigri.

Vilhelm Gunnarsson, ljósmyndari Fréttablaðsins og Vísis, var á leik Fram og Keflavíkur á Laugardalsvellinum í gær og náði þessum skemmtilegu myndum. Myndirnar má sjá í albúminu hér að neðan. Hægt er að sjá myndirnar stærri með því að smella á þær.